Xefe Estadu Hato’o Solidariedade ho Indonéziu Hafoin Rai-Nakdoko ho Magnitude 7.7 iha Flores

Uma no infraesturura sira hetan estragu impaktu husi rai-nakdoko ho magnitude 7.7 iha Illa Flores, Sábadu 15 Agostu 2026.

Díli, 18  Agostu 2026 (RAFA)-Xefe EStadu Timor-Leste hato’o sentidu kondolénsia kle’an ba Governu no povu Indonézia hafoin rai-nakdoko katastrófiku ne’ebé akontese iha illa Flores ho magnitude 7.7  hodi rezulta ema na’in-53 mate, na’in-110 kanek, no no na’in-3,839 maka dezlokadu. Dadus ida-ne’e sei verifika hela no bele muda bazeia ba kolesaun dadus iha terrenu.

Iha karta formál ida ne’ebé diriji ba Prezidente Repúblika Indonézia, Prabowo Subianto, iha loron 18 fulan-Agostu 2026, Xefe Estadu Timoroan ne’e espresa tristeza kle’an kona-bá dezastre, ne’ebé desloka ema rihun ba rihun no estraga maka’as uma, fasilidade saúde, eskola no infraestrutura krítiku sira.

“Ha’u hakarak hato’o ba Sua Exelénsia ha’u-nia sentidu kondolénsia ne’ebé kle’an no hato’o profunda solidariedade Timor-Leste nian ba família sira ne’ebé lakon sira-nia ema ne’ebé sira hadomi, nune’e mós ba sira hotu ne’ebé afetadu husi dezastre trájiku ida-ne’e. Iha tempu ne’ebé nakonu ho terus no sofrimentu ida-ne’e, Timor-Leste hamriik iha solidariedade fraterna ho povu Indonézia, liuliu komunidade sira iha área Flores ne’ebé afetadu maka’as liu, ne’ebé hasoru hela konsekuénsia husi katástrofe ida ne’e no dezafiu imensu ne’ebé rezulta husi destruisaun infraestrutura no interupsaun ba asesu ba servisu esensiál sira,” Prezidente Repúblika, José Ramos-Horta haktuir hanesan Rafa sira iha komunikadu ofisiál, Tersa-ne’e.

Xefe Estadu hato’o agradesimentu ba ekipa sira ba buska no salvaguarda nian, profisionál saúde, forsa seguransa, no voluntáriu sira ne’ebé kontinua serbisu ho aten-barani iha kondisaun sira ne’ebé susar tebes hodi tulun populasaun sira ne’ebé afetadu.

Prezidente José Ramos-Horta konklui nia mensajen ho deseju sinseru ba rekuperasaun lalais ba sira ne’ebé kanek no hato’o ninia esperansa katak esforsu tulun no rekonstrusaun sei hamenus lalais sofrimentu husi komunidade sira ne’ebé afetadu.

Jornalista: Cristina Ximenes