Janeiru-Agostu, Asidente Tráfiku Rejulta Na’in-21 Lakon Vida

Xefe Seksaun Polísia Tránzitu Munisípiu Díli, Superintendente Asistente Polísia Delfim da Silva.

Díli, 17 Agostu 2026 (RAFA)- Durante fulan-neen, husi  Janeiru to’o Agostu ne’e, Polísia Tránzitu Munisípiu Díli rejista kazu asidente tráfiku hamutuk 706, no husi totál kazu ne’e, ema na’in-21 lakon vida,  na’in-77 hetan kanek todan, no na’in-656 hetan kanek kmaan.

Xefe Seksaun Polísia Tránzitu Munisípiu Díli, Superintendente Asistente Polísia Delfim da Silva, Segunda-ne’e, informa númeru asidente tráfiku ne’e hatudu katak seguransa rodoviária sei sai dezafiu importante iha Munisípiu Díli.

“Ami rejista kazu total 706 ne’ebé  rezulta  ema na’in-21 mate, kanek todan na’in-77, no kanek kmaan na’in-656. Iha mós ema 586 ne’ebé envolve iha asidente maibé la hetan kanek,” Delfim da Silva  informa ba RAFA iha nia servisu fatin, Komandu PNTL Munisípiu Díli.

Superintendente Asistente Polísia ne’e esplika asidente tráfiku sira ne’e akontese tanba razaun oioin, inklui motorista sira kondús ho velosidade aas, la fó atensaun diak ba kondisaun estrada, uza telefone durante kondusaun, no konsumu bebida alkólika.

Nia hateten Polísia Tránzitu kontinua servisu hamutuk ho Direksaun Nasionál Transporte Terrestre (DNTT) no Direksaun Nasionál Seguransa Rodoviária, liuhusi Ministériu Interiór, atu hala’o sensibilizasaun ba motorista no utilizadór estrada kona-bá importánsia seguransa rodoviária.

Asidente tráfiku bele mosu tanba fatór oioin, hanesan la kumpre regra Kódigu Estrada, kondisaun veíkulu la apropriadu, kondisaun estrada, falta atensaun durante kondusaun, velosidade aas no konsumu bebida alkólika.

Polísia Tránzitu iha responsabilidade atu kontrola no implementa regra Kódigu Estrada, ho objetivu atu prevene asidente no proteje vida utilizadór estrada.

PNTL mós kontinua sensibiliza motorista no utilizadór estrada atu respeita sinal tráfiku no regra sira ne’ebé aplika iha estrada públika.

Polísia Tránzitu kontinua hala’o monitorizasaun no operasaun iha estrada públika hodi asegura motorista sira kumpre regra no, liuliu hodi reduz risku asidente tráfiku no salva vida.

Jornalista: João Carlos