Prezidente Repúblika Propoin Ba Komandu PNTL Ezonera Membru Ne’ebé Tiru Silvano Gomes iha Irabin de Baixo

Prezidente Repúblika, José Ramos-Horta.

Díli, 17 Agostu 2026 (RAFA)- Prezidente Repúblika, José Ramos-Horta, kondena maka’as aktu membru Polísia Nasionál Timor-Leste (PNTL) ne’ebé tiru Silvano Gomes ho arma Estadu to’o vitíma lakon vida.

Xefe Estadu propoin ba Komandu Jerál  PNTL atu ezonera membru ne´e tanba konsidera halo krime grave hasoru sidadaun sira no utiliza arma Estadu nian la tuir prosedimentu ne’ebé aplikavel.

Prezidente Repúblika José Ramos-Horta hatete, Komadante Jerál PNTL  hatene  ona atu halo saida, primeiru ba Becora, segundu julgamentu hetan pena todan, terseira tenke iha esplikasaun ruma. Tanbasá mak ema nune’e ba halo fali kontrolu Tránzitu, ne’e só ema lanu mak halo ne’e.

“Ne’e inaseitavel, nia tenke prosesu esplusaun husi PNTL no justisa mak haré tenke ba ida kadeia todan. Ne’e halo aat ba PNTL nia naran, kontrolu tranzitu, tanbasá mak lori fali kilat ba kontrolu tranzitu,”  Prezidente Repúblika, José Ramos-Horta  hateten, Segunda-ne’e.

Xefe Estadu haktuir hodi fó ezemplu, bainhira nia ba Giné-Bisau iha 2013 nu’udar reprezentante Sekretáriu Jerál iha Giné-Bisau situasaun ne’ebé difisil tebe-tebes, elementu seguransa Timoroan ba ho nia probiu la lori kilat. Nune’e mós elementu ONU iha Giné-Bisau servisu ho nia la autoriza sira la lori kilat, besik tinan rua iha Giné-Bisau, situasaun maka’as loos iha ne’eba.

Silvano Gomes, hetan tiru husi membru Polísia Nasionál Timor-Leste (PNTL) iha Suku Irabin de Baixo, Postu-Administrativu Uatocarbau, Munisípiu Viqueque, no hakotu ona iis iha Ospitál Nasionál Guido Valadares (HNGV), Díli, iha tuku 09:00 dadeer hafoin hala’o tratamentu intensivu durante loron-rua.

Jornalista: Cristina Ximenes