Ró “Feira Livru” Douglas Hope Lori Ksolok Mai Timoroan sira

Timoroan sira komesa asesu ona ba lee livru iha Ró “Feira Livru” Douglas Hope iha Portu Díli, Segunda 17 Agostu 2026.

Díli, 17 Agostu  2026 (RAFA)- Prezensa Ró “Feira Livru” Douglas Hope iha Portu Díli, Sábadu, 15 Agostu ne’e, lori ksolok ba Timoroan sira ne’ebé toman lee livru  hodi fasilita sira hetan livru sira ne’ebé sira prezisa.

Vizitóra Merlinda Sarmento Mendes ba RAFA, Segunda-ne’e, iha Portu Díli hateten, kontente no orgullu tanba Ró “Feira Livru” Douglas Hope bele mai fali Timor-Leste hodi atende públiku sira asesu ba livru rihun ba rihun ne’ebé ró refere lori mai atu fasilita Timoroan sira lee no sosa.

Nia hatutan ró ne’e nakonu ho livru barak no oin-oin, hahú husi livru sira ba estudante sira husi nivel infatil too universitdade, inklui livru sira kona-bá família, ferik no katus no seluk tan.

Vizitóra Merlinda Sarmento  rekoñese katak dezafiu id aba Timoroan sira mak seidauk ábitua ho kultura lee  nune’e nia espera katak ho  prezensa Douglas Hope bele motiva Timoroan sira badinas lee no laibur livru sira hanesan riku ida ba sira iha futuru.

“Dala barak ita laiha ábitu lee, dala barak ita lee iha telefone, se ita lee iha telefone sei fó impaktu ba ita nia matan, bainhira lee livru la impaktu ba ita nia matan. Tanba lee ne’e importante, tanba ita nia nasaun ne’e ema uitoan gosta lee, balun la gosta lee entaun laiha buat ida, maibé ida ne’e loke ba ema hotu-hotu bele mai lee no sosa livru,” Merlinda Sarmento Mendes hateten.

Merlinda dehan, komunidade ne’ebé nia hela ba ladun lee tanba ho teknolójia ne’ebé mudansa tebes, ema hotu-hotu kaer telefone, entaun sira ladun gosta lee livru, maibé lee llivru nia di’ak mak ema bele iha referénsia barak liutan bainhira halo peskiza ba sosiedade.

Iha fatin hanesan, vizitór Eafet Marchal hateten, haré ba situasaun iha Timor kona-bá ábitu lee livru ne’e menus tebes, iha universidade sira biblioteka barak, maibé menus estudante tama ba lee livru sira.

“Tuir loloos lee ne’e mak sai importante ba ema hodi aprende buat  barak. Tanba lee barak ita mós aprende buat barak ne’ebé ita seidauk hatene. Maluk sira nafatin lee nune’e hatene buat barak liután, se ita la lee mak ita sei la aprende buat barak no hatene kle’an saida mak ita presiza hatene,” nia haktuir.

Sira mos enkoraja sosiedade, liu-liu foin-sa’e sira atu nafatin lee livru hodi aumenta koñesimentu no lee ne’e rasik di’ak ba futuru.

 Jornalista: Cristina Ximenes