PR Enkoraja Sidadaun Sira Halo Leitura no Sosa Livru Hanesan Investimentu Ba Futuru

PR José Ramos-Horta haré livru sira iha Ró Doulos Hope, Segunda 17 Agostu 2026.

Díli, 17 Agostu 2026 (RAFA)- Prezidente Repúblika, José Ramos-Horta, enkoraja sidadaun sira halo leitura barak no sosa livru sira hanesan investimentu ba futuru.

“Ha’u bele hateten, sosa livru sira. Ida-ne’e mak enkorajamentu liután no ha’u gosta livru sira ne’ebé di’ak,” Ramos-Horta iha nia diskursu iha abertura ofisiál ba Ró Doulos Hope ne’ebé lori  livru oi-oin (feira livru) fasilita Timoroan sira lee no sosa iha Portu Díli, Segunda-ne’e.

Xefe Estadu haktuir, bainhira ba Nova Iorke, ba Asembleia Jerál ONU nian, maiória iha eskritóriu sira ne´e sempre buka oportunidade atu bá iha libraria Barnes and Noble.  Tamba ne´e, ideia husi ró ida-ne’e sei uza husi nasionalidade barak, no oinsá fó oportunidade ba ema hotu atu hetan livru oin-oin no fó oportunidade ba  foin-sa’e sira, hanesan mós ba estudante sira, akadémiku sira, sé de’it no ne´e mak priviléjiu úniku.

Iha fatin hanesan, Direitora Ró Doulos Hope, Trizenia September lori tripulasaun MV Doulos Hope nia naran, agradese liuliu ba prezensa husi konvidadu onra sira, Prezidente Repúblika, José Ramos-Horta ho konvidadu husi departementu oin-oin governu nian ne’ebé rekoñese no simu Ró Douglas Hope ho ekipa iha Timor-Leste.

“Ita-boot sira nia kooperasaun no parseria sai importante tebes hodi halo vizita ida-ne’e sai posivel. Ami hato’o ami nia agradesimentu sinseru ba ita-boot sira nia apoiu no fasilitasaun durante vizita portu ida-ne’e. Obrigadu espesiál ida mós ba tau-matan ba Felicia no Keira durante preparasaun antisipada  iha Dili. Agora ofisialmente ha’u bele dehan katak ida ne’e mak ha’u-nia vizita datoluk mai Timor-Leste,” Direitora RoóDoulos Hope, Trizenia September hateten.

Bainhira Doulos Hope halo nia vizita inaugural iha Dili no simu ho laran-manas husi ema barak ne’ebé vizita feira livru nian no tuir eventu sira. Hanoin liu-liu númeru boot husi joven sira ne’ebé mai iha ró laran hodi esplora feira livru nian, hasoru tripulasaun, no kria memória sira ne’ebé dura hamutuk liuhosi fotografia sira ne’ebé sura labele.

Nia esplika, Doulos Hope, ne’ebé signifika “Atan Esperansa nian”, mak ró foun liu iha frota globál. Iha ró laran iha ekipa multikulturál ida ho voluntáriu 100 resin husi nasaun 37 liu, ne’ebé unidu hosi hakarak komún atu fahe koñesimentu, tulun, no esperansa iha portu hotu-hotu ne’ebé vizita.

Liu husi feira livru flutuante, programa sira interkámbiu kulturál nian, inisiativa edukasionál sira, no envolvimentu komunitáriu ne’ebé signifikativu. Tanba hafolin mandamentu atu hadomi Maromak ho laran, neon no klamar tomak, no hadomi maluk hanesan an rasik. Tanba ne’e, tama iha portu ida-idak ho postura servisu nian, hodi buka atu serbisu hamutuk ho komunidade lokál sira no fahe mensajen esperansa nian.

Iha misaun nia fuan mak fiar katak esperansa la’ós buat ida ne’ebé dook, ida-ne’e nak buat ida ne’ebé bele hili atu fahe loroloron iha maneira ki’ik no intensionál sira. Karik ida-ne’e konversa ida ne’ebé enkoraja, rekursu ida ne’ebé ekipa, ka momentu ligasaun ida ne’ebé fó hanoin ba ema ida katak sira la mesak, fiar katak interasaun hotu-hotu iha potensiál atu hamosu mudansa pozitivu.

“Nu’udar komunidade Doulos Hope, ami hein atu aprende buat barak liután hosi ita-boot durante vizita ida-ne’e. Ho maneira ida-ne’e, koñesimentu fahe bainhira ita aprende liután kona-ba sé maka ita-boot no saida maka ita-boot valoriza. Nu’udar amizade sira forma entre ita-boot no ami, ami hein atu troka ami nia istória esperansa nian ba malu,” tenik nia.

Ró Doulos Hope atraka iha Portu Díli iha Sábadu, 15 Agostu-ne´e, iha tuku 10:00 OTL no Totál livru rihun rua-resin. Livru sira ne´e faan ho folin husi $25 to’o $1000 no sei loke ba públiku hahú  Tersa-feira, 18 Agostu 2026, oras tuku 10:00  dadeer to’o  tuku 05:00 lorokraik.

Jornalista: Cristina Ximenes