UEUMV Kondena Asaun Membru PNTL Ne’ebé Tiru Silvano Gomes iha Irabin de Baixo

Uniaun Estudante Universitáriu Munisípiu Viqueque (UEUMV) kondena aktu membru PNTL me'ebé tiru Silvano Gomes

Díli, 17 Agostu 2026 (RAFA)- Uniaun Estudante Universitáriu Munisípiu Viqueque (UEUMV) kondena aktu membru Polísia Nasionál Timor-Leste (PNTL) ne’ebé utiliza arma estadu hodi tiru Silvano Gomes iha Suku Irabin de Baixo, Postu-Administrativu Uatocarbau, Munisipiu Viqueque , foin lalais ne’e.

Vitíma Silvano Gomes, hetan tiru husi membru PNTL  ida iha Uatocarbau  tanba vitíma kondisu motór la uza kapasete.  Iha Segunda-ne’e, Silvano Gomes hakotu ona iis iha Ospital Nasionál Guido Valadares (HNGV), hafoin loron rua halo tratamentu iha ospitál refere.

“UEUMV hamutuk ho familia vitíma hola posizaun hodi denunsia lamentasaun ba públiku, kona-bá kazu membru PNTL utiliza arma tiru hasoru Silvino Gomes to’o hakotu iis, Segunda-ne’e,” portavós UEUMV, Apolinario da Cruz,  hateten liuhosi Konferénsia Imprensa, iha Jardín 5 de Maio, Segunda-ne’e.

Informasaun ne’ebé família deskreve katak vitíma uza motór hodi halao nia atividade diaria ho diresaun husi Tardiga ba Wani-uma, maibé la utiliza kapasete hodi hala’o viajen iha estrada públiku, nunee parte PNTL Postu Uatocarbau, hala’o nia knaar hanesan tránzitu hodi kontrola movimentu rodoviáriu iha postu refere, no tuir informasaun sira publika iha media sosial katak tamba hetan provokasaun husi vitima rasik, nune’e PNTL utiliza pistola hodi tiru sidadaun, iha parte isin lolon to’o grave.

Vitíma monu ho distansia dok kuaze  metro 150 husi fatin akontesementu. Hafoin akontesementu membru PNTL ne’ebe tiru, abandona vitima banhira hetan kanek grave.

UEUMV no família ezije investigasaun justu no transparánsia atu hetan justisa ne’ebé loos. Tanba ne’e husi familia vitíma no Uniaun Estudante Universitariu Munisipiu Viqueque lamentavel tebes ho atuasaun PNTL nian hasoru sidadaun, nune’e hakarak hatoo ba parte relevante sira atu toma atensaun ba membru PNTL tomak, ne’ebé laiha profisionalimu no la respeita sidadaun nia direitu, liu-liu dignidade ema ida-idak nia moris.

UEUMV  husu Komandante  PNTL Munisípiu Viqueque no Komandu Jerál PNTL loke prossesu investigasaun ida rigor, atu prosesa suspeitu tuir dalan legal. Ne’ebe labele hamosu familiarismo, komandismo.

Husu ba Ministériu Interiór no Komandu Jerál PNTL nu’udar orgaun másimu iha instituisaun seguransa atu demita emediatamente membru ka pesoál PNTL ne’ebé hatudu  nia inkapasidade iha povu nia leet tanba ida ne’e fó ameasa sidadaun nia vida.
Husu ba Provedór Direitu Humanu no Justisa ( PDHJ) atu fiskaliza kazu akontesementu ho seriedade hodi defende vitima nia dirietu

Husu ba ministeriu  interiór liu husi Komandu geral atu kontrola no fo treinamentu profisional ba membru PNTL sira ne’ebe sei mukit iha konesementu hodi hasae konesementu atu halao nia misaun los no lolos tuir Lei haruka.

Husu ba Ministériu Públiku nu’udar orgaun independente atu defende de’it legalidade maka tenke prosessa kazu ida ne’e tuir prinsipiu legalidade hodi hatuur justisa hanesan ba ema hotu.

Iha fatin hanesan Cedelizio Koutchay Moniz  hateten, hahalok oknum Polísia ne’e hanesan kriminozu no bandalizmu. Hanesan fali militár sira uluk tiru inan aman too agora rate la iha, hahalok ne’e  labele hatudu iha estadu ida ne’e.

“Agora vitíma hakotu iis ona,  ita labele dehan katak ho razaun oi-oin merese para PNTL tiru ne’e labele akontese,” estudante universitáriu Cedelizio Koutchay Moniz haktuir.

Polísia labele lori nia problema interna ka privadu hodi tiru fali povu, tenke servisu tuir Leí no orden ba interese estadu.

Kuandu la uza kapasete iha regra tránzitu hodi fó sansaun ba infratór sira la’ós ho asaun tiru.

Ikus liu Hakarak apelu ba povu doben Timor-Leste hamutuk kondena no la tolera aktu bandalizmu, brualismu husi membru PNTL sira ne’ebe imkumprimentu ba lei hodi hasoru sidadaun sira.

 Jornalista: Juvinal Cabral dos Santos