Silvano Gomes Ne’ebé Hetan Tiru Husi Membru PNTL iha Irabin de Baixo Hakotu Iis iha HNGV

Família matebian Silvano Gomes akompañia iha Mortuáriu HNGV, Segunda 17 Agostu 2026.

Díli, 17 Agostu 2026 (RAFA) – Jovem Silvano Gomes, ne’ebé hetan hetan tiru husi membru Polísia Nasionál Timor-Leste (PNTL) iha Suku Irabin de Baixo, Postu-Administrativu Uatocarbau, Munisípiu Viqueque,  hakotu ona iis iha Ospitál Nasionál Guido Valadares (HNGV), Díli, iha oras tuku 09:00  dadeer hafoin hala’o tratamentu intensivu durante loron-rua.

Notísia Relevante: Xefe Suku ho Komunidade Irabin de Baixo Kondena Membru PNTL Tiru Silvano Gomes Tanba La Uza Kapasete

Família matebian Elizario da Silva ba jornalista sira iha HNGV, Segunda-ne’e konfirma katak família hakarak lori prosesu ne’e tuir dalan legál nune’e prosesa membru Polísia ne’ebé tiru sira-nia oan Silvano Gomes.

“Nia mate ona, klaru ami família ninia prosesu ne’e tenke tuir Leí, karik matebian mak sala mós la buat ida,  mais prosesu ne’e tenke to’o Tribunál mak deside. Ami família nia hakarak buat hotu-hotu tuir Leí. Ohin, polísia mai ona ko’alia ho ha’u atu autopsia, ha’u aturiza autopsia para bele hetan evidensia ruma karik prosesu ne’e la’o bá,”  Elizario da Silva hateten.

Agora dadaun, Silvano Gomes nia isin mate tau hela iha Mortuáriu HNGV ne’ebé akompaña husi família no ekipa Polísia Forénsika hodi konsulta malu atu submete mate-isin ba autópsia.

Tuir kronolojia,  membru PNTL ida  ne’ebé tiru Silvano Gomes iha kabun tanba vítima kondus motór la uza kapasete iha Sábadu 15 Agostu-ne’e, hale’u tuku 08:30 Otl.

Sasin Xefe Suku José Baptista do Carmo, haktuir hanesan baibain iha dadersan tránzitu ba hein iha areadór eskola EBC 13 oin, atu estudante sira ba eskola karik sira hapara karreta motór ne’ebé halai ho velosidade atu nune’e estudante sira ultrapassa estrada ba eskola.

Nia hatutan, banhira  insidente akontese,  polísia ho sira nia karreta  transporte kedas vítima Silvano Gomes ba iha sentru saúde Uatocarbau, depois halo tiha tratamentu ambulánsia kontinua transporta ba iha Munisípiu Viqueque hodi hein aviaun halo evakasaun ba HNGV tanba vítima nia kondisaun grave, tiru husi knotak kotuk borus tiha kabun oin.

Jornalista: João Carlos/Juvinal Cabral