Xefe Suku ho Komunidade Irabin de Baixo Kondena Membru PNTL Tiru Silvano Gomes Tanba La Uza Kapasete

Vitíma Silvano Gomes hala'o hela tratamentu intensivu, Sábadu 15 Agostu 2026.

Díli, 15 Agostu 2026 (RAFA)- Xefe Suku  José Baptista do Carmo ho komunidade no komunidade Suku Irabin de Baixo, Postu-Administrativu Uatocarbau, Munisípiu Viqueque, kondena atuasaun membru Polísia Nasionál Timor-Leste (PNTL) ne’ebé tiru Silvano Gomes iha kabun tanba kondus motór la uza kapasete iha Sábadu-ne’e, hale’u tuku 08:30 Otl.

Xefe Suku José Baptista do Carmo, haktuir hanesan baibain iha dadersan Polísia Tránzitu ba hein iha areadór eskola EBC 13 oin, atu estudante sira ba eskola karik sira hapara karreta motór ne’ebé halai ho velosidade no  hapara, atu nune’e, labarik sira ultrapassa estrada ba eskola.

“Nu’udar membru Polísia Unidade  Tránzitu hatene Lei Tránzitu Rodoviáru, tanba bainhira sira haré motorista kondus motór la uza kapasete tenke hapara no aplika sansaun, la’ós uza arma Estadu nian hodi tiru kedas. Ami nu’udar autoridade la satisfas, la simu membru Polísia nia hahalok hanesan ne’e,” Xefe Suku Irabin de Baixo, José Baptista do Carmo hateten ba RAFA via telefone.

Nia hatutan, banhira  insidente akontese,  polísia ho sira nia karreta  transporta  kedas vítima Silvano Gomes ba iha sentru saúde Uatocarbau, depois halo tiha tratamentu ambulánsia kontinua lori ba iha Munisípiu Viqueque hodi hein aviaun evakua ba Ospitál Nasionál Guido Valadares (HNGV) tanba vitíma nia kondisaun grave, tiru husi kanotak kotuk ba borus tiha ba kabun oin.

“Ha’u bolu vítima nia aman no xefe aldeia ho nia família, ami ba duni  iha Eskuadra Polísia, no ami hasoru malu ona Komadante Eskuadra ho Segundu Komandante Eskuadra  Polísia no Xefe Polísia Operasaun, ami konversa lubuk ida atu oinsá akalma situasaun no prevene akontesimentu sira hanesan ne’e labele akontese tan. Maibé kazu ne’e nia  prosesu kontinua ba oin,”  Xefe Suku Irabin de Baixo haktuir.

Autoridade no joventude deskontenti no la simu membru Polísia nia hahalok ida-ne’e ba nia povu  tanba kazu ne’e foin primeira-vez akontese iha Postu Administrativu Uatocarbau.

HABADA no FM husu Komandu PNTL Viqueque Loke Investiga saun

 Organizasaun sosiédade sivíl husi Hali Ba Dame (HABADA) no Fundasaun Mahein (FM) husu komandu Polísia Nasionál Timor-Leste (PNTL) Munisípiu Viqueque atu halo investigasaun ba akontesimentu iha Suku Irabin de Baixo ne’e  hodi hetan nia verasidade husi akontesimentu ne’ebé afeta ba vítima Silvano Gomes.

Diretór Ezekutivu HABADA, Abel Amaral hateten, liga ho akontesimentu iha Viqueque ne’e husu presiza investigasaun ne’ebé kle’an husi Komandu Polísia Munisípiu Viqueque.

HABADA nia pozisaun, husu Komandante PNTL Viqueque atu halo investigasun ba akontesimentu ne’e. Tanba tuir alegasaun membru ka pesoal PNTL balu utiliza arma la tuir Standard Operational Procedure (SOP),” Diretór Ezekutivu HABADA, Abel Amaral informa ba RAFA .

Diretór HABADA ne’e hatutan, karik iha investigasaun mak deteta akontesimentu ne’e loos duni, maka Komandante tenke investiga fila-fali membru refere no tenke fó sansaun disiplinár no mós tenke loke investigasaun kriminál.

Diretór Ezekutivu Fundasaun Mahein, Nelson Belo hateten, diskuidu ka asidente ida-ne’e kuaze akontese  bei-beik ona, uluk kazu Kuluhun, kazu iha Maliana, kazu sira ne’e akontese bei-beik ona.

Fundasaun Mahein rekomenda dala barak ona iha momentu barak katak, polísia ka militár presiza ona teste psikolójika. Teste psikolójika ne’e tenke anualmente akontese atu bele hatene polísia sira ne’e psikolojikamente sira bele kontrola kilat sira ne’ebé sira uza hodi halo servisu ka la’e.

Nia haktuir, sira bele uza kilat sira ne’e iha momentu sertu ne’ebé nesesáriu, la’ós uza ba tempu ida la nesesáriu.

Nia hatutan, instituisaun la haré tuir sala sira ne’ebé iha, problema sira hanesan kazu Kuluhun, kazu Maliana ne’ebé ema sivíl sai vitíma ba uza sala kilat no forsa, ida-ne’e tempu ona presiza iha anualmente teste ba psikolójika, hahú husi ajente sira to’o komandante sira.

“Se ida ne’e lahalo, ita la hatene katak psikolojikamente sira kontrola kilat ne’ebé sira kaer ka la’e. Deskonfia ne’ebé iha se ema sivíl ida, sira  tiru hanesan buat baibain, ida-ne’e presiza iha investigasaun ida atu bele hatene klean katak tanbasá mak tiru. Maibé presiza haré fila-fali ona teste psikolójika ne’e mais importante,” hateten Diretór Ezekutivu Fundasaun Mahein Nelson Belo.

To’o notísia ne’e públika, RAFA seidauk halo konfirmasaun ofisiál ho Komandu PNTL Munisípiu Viqueque no Komandu Jerál PNTL kona-bá insidente ne’e. Entertantu, parte husi família vítima nian husu atu iha justisa ba vítima no tratamentu saúde emerjénsia ba vítima nune’e bele salva Silvano Gomes nia vida.

Jornalista: Juvina Cabral dos Santos/ Cristina Ximenes