Governadór Provínsia NTT Husu Aero Díli Halo Oprasaun Díli-Kupaun

Diretór Ezekuitvu Aero Dili, Lourenço de Oliveira, halo enkontru ho Governadór NTT, Melki Laka Lena ho nia ekipa iha Kupaun, Sesta 14 Agostu 2026. Imajen/Espesiál

Díli, 15 Agostu 2026 (RAFA)-Governadór Provínsia Nusa Tenggara Timur (NTT)-Indonézia, Melki Laka Lena, husu prontidaun empreza Aero Dili, atu bele halo operasaun voo Díli ba Kupaun.

Pedidu Governadór  Melki Laka Lena nian ne’e hato’o diretamente ba Diretór Ezekutivu no na’in ba Aero Dili, Lourenço de Oliveira, iha enkontru ne’ebé hala’o iha repartisaun Governadór NTT nian iha Kupaun, Sesta-ne’e.

Diretór Ezekutivu Aero Dili, Lourenço de Oliveira, ne’ebé daudaun ne’e estadia hela iha Kupaun, ba RAFA liuhosi telefone haktuir katak nia parte hetan konvite husi Governadór   Melki Laka Lena hodi hasoru malu no diskute posibilidade voo Aero Dili nian husi Díli ba Kupaun no liubá Darwin-Austrália.

 “Governadór Melki Laka Lena husu atu Aero Dili bele halo operasaun Díli-Kupaun, maibé husi ami nia parte sei tetu tanba daudaun ne’e Aero Dili foin iha armada rua; A320 ho A319 ne’ebé nia oras voo la sufisiente. Tanba ne’e, ba tinan oin, tenke aumenta tan armada Aero Dili nian ida hodi bele haré posibilidade voo Díli-Kupaun,”  Lourenço de Oliveira hateten.

Dau-daun ne’e, Aero Dili ho nia armada rua A320 ho A319 halo operasaun kada loron Díli-Denpasar/Bali, Díli ba Darwin-Austrália semana ida dala rua (Tersa ho Domingu), no Díli-Xina/Xiamen kada semana dala-rua.

Aero Dili (Aero Dili Service Transport) mak kompañia aérea nasionál dahuluk iha Timor-Leste, ho nia sede no hub prinsipál iha Aeroportu Internasionál Prezidente Nicolau Lobato, Comoro, Díli.

Kompañia Aero Dili funda  iha  loron 21 fulan-Juñu tinan 2018 husi emprezáriu timoroan Lourenço de Oliveira, hodi hahú operasaun ho aviaun ki’ik hodi apoia mós servisu doméstiku no seguransa.

Iha tinan 2023, Aero Dili lansa voo internasionál komersiall dahuluk ba Denpasar/Bali (Indonézia) iha  loron 12 fulan-Maiu 2023, uza aviaun Airbus A320, ne’ebé lori mudansa boot ba aviasaun sivíl iha Timor-Leste.

Jornalista: Remigia Locatelli