Rai-Nakdoko iha Flores ho Magnitude 7.7 Poténsia Hamosu Tsunami

Rai-Nakdoko ho magnitude 7.7 iha Rejiaun Flores, Indonézia, Sábadu 15 Agostu 2026.

Díli, 15 Agostu 2026 (RAFA)–Iha Sábadu, 15 fulan-Agostu 2026, haleu tuku 4:58 dadeer, oras timor osidentál, akontese rai-nakdoko ho magnitude 7.7 iha rejiaun Flores, NTT ka Nusa Tenggara Timur.

Tuir análize Ajénsia Meteorolojia, Klimatolojia, no Jeofízika (BMKG, sigla Indonézia) indika katak rai-nakdoko iha parametru atualizadu ho magnitude 7.7 iha poténsia atu hamosu tsunami iha área Manggarai Leste,  Sikka, no Nagekeo, Rejiaun Flores, inklui rai sira ne’ebé besik.

Iha alerta BMKG nian ne’ebé RAFA asesu haktuir bazeia ba Standard Operating Procedure (SOP) sira ne’ebé aplikavel, BMKG fó sai ona alerta antesipada kona-bá tsunami ba parte interesada sira no públiku.

Alerta antesipada  dahuluk fó sai iha tuku 05:00:39 oras timor osidentál ka minutu  segundu hafoin rai-nakdoko no alerta antesipada  daruak nian fó sai iha tuku 05:09:56  oras Timor Osidentál ka minutu 11 segundu  hafoin rai-nakdoko.

BMKG sei kontinua monitoriza atividade aftershock no altura tsunami bazeia ba observasaun nível tasi, no fornese informasaun atualizadu ba parte interesada sira no públiku.

Diretór Rai-Nakdoko no Tsunami BMKG-Indonézia  Wijayanto iha nia apleu ne’ebé haktuir ba  públiku sira iha Flores no rai sira ne’ebé besik atu mantein kalma no labele hetan influensia husi boatu sira ne’ebé la verifikadu, evita edifísiu sira ne’ebé nakfera ka estraga tanba rai-nakdoko, halo evakuasaun ba sira ne’ebé iha área ho estatutu “alerta” no “stanbby” no hadook an husi tasi-ibun no mota-ninin ba sira ne’ebé iha área ho estatutu “alerta”.

 Na’in-Rua Lakon Vida

Husi sorin seluk, Ajénsia Jestaun Dezastre nian ka  BNPB (Badan Nasional Penanggulangan Bencana) Indonézia nian, fó sai iha sira-nia pajina ofisiál katak ema na’in-rua  (feto ida no mane ida) iha Sikka lakon vida  tanba dezastre rai-nakdoko ne’e.

Iha área Nagekeo, sente rai-nakadoko maka’ás tebes durante minutu ida nia laran, no maioria rezidente sira halai sai hosi sira-nia uma.

Ekipa konjunta  kompostu hosi Ajénsia Nasionál Buska no Resgate (Basarnas, sigla Indonézia), Tentara Nasionál Indonézia (TNI) ho Polísia  sira hala’o hela evakuasaun iha fatin akontesimentu.

Ajénsia Nasionál Jestaun Dezastre (BNPB, sigla indonézia) no Ajénsia Jestaun Dezastre Rejionál (BPBD, sigla indonézia) Rejénsia Sikka kontinua halo koordenasaun ho autoridade lokál sira hodi tulun vítima sira no garante seguransa ba komunidade sira iha área afetadu sira.

BNPB sei atualiza hela dadus sira kona-ba rai-nakdoko nia impaktu iha área sira ne’ebé afetadu. Kolesaun dadus inklui vítima mortál, kanek, estragu ba edifísiu, no impaktu sira seluk. Informasaun kona-ba númeru vítima no estragu sira sei fornese bazeia ba verifikasaun hosi ofisiál BNPB sira iha terenu.

Reportajen Kontribuidór RAFA