Labele Partidariza Apoia Subvensaun Públiku Ba Média Sira

Prezidente Repúblika, José Ramos-Horta.

Díli, 14 Agostu 2026 (RAFA)- Prezidente Repúblika, José Ramos-Horta, husu ba Governu liu-liu Sekretáriu Estadu Komunikasaun Sosiál (SEKOMS) la bele partidariza subvensaun públiku ba órgaun komunikasaun sosiál ka média sira.

“Ha’u promulga tiha ona subvensaun ba órgaun komunikasaun. Ha’u apoia 100% ba orsamentu 2027. Ha’u apoia desde uluk kedas, bainhira ha’u sei eis-Prezidente Repúblika, ha’u ko’alia kona-ba ida ne’e. Momentu ne’eba governu halo ona, maibé depois mai iha Prezidente Repúblika, Francisco Guterres “Lú-Olo”  mak veta tiha no agora Governu tau fila fali, ha’u promulga tiha ona,” Prezidente Repúblika, José Ramos-Horta informa ba jornalista sira iha Palásiu Prezidensiál, Sesta-ne’e.

Xefe Estadu hatete, apoia de’it mak jornalista profesionál, sira ne’ebé servisu duni, han, hemu mai husi sira nia servisu iha média. Sira ne’ebé tinan hira ona hatudu katak, halo sakrifisiu nu’udar jornalista, la’ós sira média sosiál Facebook ne’e, la’e!

Ramos-Horta subliña média profisionál mak jornál sira iha Dili laran, balun online profisionál, televizaun.

“Rádiu komunitáriu ha’u apoia. Tanba fatin balun iha Timor rádiu komunitáriu mós ema rona. Ha’u depois haré ho governu, ministru didi’ak konkretamente apoia nia atu ba ne’ebé, labele partidariza. Labele tentasaun fó liu ka fó de’it ba média ne’ebé hanesan besik liu partidu ida ne’e ka partidu ida ne’ebá, la’e. Tenke fó duni, se ita partidariza hanesan halimar fali ho ema nia vida, ema nia servisu, la hatudu ona respeitu ba ema nia integridade tanba nia araska entaun fó osan ba la’e, ha’u la konkorda ho ida ne’e,” Xefe Estadu esplika.

Prezidente Repúblika hatete nia parte sei haré no akompaña implementasaun lei ne´e, tuir dunik saida mak hakerek iha lei ne´e ga lae.

Iha loron 29  fulan-Jullu 2026, Konsellu Ministru aprova projetu Dekretu-Lei, ne’ebé aprezenta husi Sekretáriu Estadu Komunikasaun Sosiál, Expedito Dias Ximenes, kona-bà Rejime subvensaun públika ba órgaun komunikasaun sosiál sira.

Objetivu husi diploma ida-ne’e atu hametin sustentabilidade ba setór ne’e, asegura sirkulasaun livre kona-bá informasaun, no mós promove pluralizmu no diversidade opiniaun sira.

Apoiu subvensaun públiku ne’e nu’udar inisiativa Governu nian ida ne’ebé ho objetivu atu fó apoiu ba órgaun komunikasaun sosiál sira bazeia ba rekizitu ne’ebé objetivu, transparente no la diskriminatóriu, la fó impaktu ba nia independénsia editoriál ka liberdade informasaun no imprensa nian.

Jornalista: Cristina Ximenes