Komisáriu Asistente Afonso dos Santos Husu UEP Kumpri Misaun ho Disiplina

Unidade Espesiál Polísia (UEP).

Díli, 14 Agostu 2026 (RAFA)- Komandante Jerál Polísia Nasionál Timor-Leste (PNTL), Komisáriu Asistente Polísia Afonso dos Santos, husu ba membru sira Unidade Espesiál Polísia (UEP) atu  kumpri misaun ho disiplina, profesionálismu no respeita sidadaun sira.

Komisáriu Asistente Polísia Afonso dos Santos hato’o dafirmasaun ne’e iha nia diskursu ofisiál iha aniversáriu UEP ba dala-XVII ne’ebé halao iha Kuartel UEP iha Díli, Sesta-ne’e.

“Ohin, loron hanesan momentu ida selebrasaun nian no bá rekoñesimentu ba dalan ne’ebé ho kontribuisaun ne’ebé UEP halo ba PNTL no ba seguransa ita nia rai,” Komisáriu Asistente Polísia Afonso dos Santos hateten.

Komandu jerál PNTL mós fó agradesimentu sinseru ba parseiru nasionál no internasional sira hotu ne’ebé iha tinan hirak nia laran fó apoiu,  dezenvolvimentu no kapasitasaun ba PNTL nian liu-liu UEP.

“Ha’u mós hakarak hato’o ami nia apresiasaun ba Governu no instituisaun sira seluk, parseiru  Repúblika Populár Xina, Repúblika Correia do Sul, Estadu Unidus Amérika no Repúblika Indonézia, bá apoiu no kooperasaun ne’ebé kontribui ona hodi hametin ita nia forsa polísia nia kapasidade ba nia prosesu sira hotu. Ami nia obrigadu boot ba ita-boot sira nia konfiansa, amizade no kompromisu bá Timor-Leste,” Komisáriu Asistente Polísia ne´e hateten.

Komandante  Jerál PNTL husu ba ofisiáis, sarjentu no ajente UEP tenke prontu ho dedikasaun, disiplina, profesionál no espíritu servisu bá nasaun.

Iha fatin hanesan Ministru Interiór (MI) Francisco da Costa Guterres, lori Governu nia naran hato’o parabens ba UEP ne’ebé selebra aniversáriu bá dala-17.

“Unidade ida-ne’e, unidade ida-ne’ebe mak importante tebe-tebes ba iha Komandu Jerál PNTL, unidade ida-ne’ebé mak durante ne’e kumpri hala’o ninia servisu hodi bele kumpri misaun  ne’ebé mak hato’o hela bá PNTL,” Ministériu Interior Francisco da Costa Guterres hateten.

Governante ne´e hatutan UEP sempre hasoru komplexidade risku, situasaun sira ne’ebé mak esensiál, maibé ho UEP  nia prezensa hodi ultrapassa situasaun sira ne’e para atu bele fó hakmatek ba povu Timor-Leste.

Oras ne’e daudaun Timor-Leste enfrenta hela fenómena oi-oin liu-liu kona-ba krime organizadu transnasionais. Tanba ne’e mak ezije tebe-tebes UEP nia servisu ho profesionalismu para bele hala’o servisu hodi kombate hamutuk ho instituisaun relevante sira hotu-hotu, atu nune’e, fo resposta ida ne’ebé mak loloos disiplinadu atu kombate kualker situasaun iha rai ne´e.

Iha serimónia selebrasaun aniversáriu UEP ba dala-XVII, Komandu Jerál PNTL entrega mós sertifikadu louvor ba ofisiáis UEP na’in-20  ne’ebé mak  komanda kompañia no Xefe Seksaun inklui asesor komandante UEP iha  instituisaun PNTL.

Jornalista: Juvinal Cabral dos Santos