Ramos-Horta Louva Atoni-Oan Sira Moris iha Dame

PR José Ramos-Horta halo vizita estadu iha RAEOA, Kuarta 12 Agostu 2026.

Oé-Cusse, 12 Agostu 2026 (RAFA)- Prezidente Repúblika (PR), José Ramos-Horta, louva  maturidade Atoni-oan sira  ne’ebé moris ho dame no domin hodi hakribi violénsia.

Prezidente Repúblika, José Ramos-Horta, hateten iha nia vizita Estadu  iha Rejiaun Administrativa Espesiál Oé-Cusse no Ambeno (RAEO),Kuarta-ne’e.

“Hakoak boot ba atoni-oan sira. Ha’u kontente ho situasaun iha ne’e dame loos, povu Oé-Cusse, povu ida ne’ebé matenek laiha violénsia, iha Timor tomak mós nune’e ita haré dame loos, dala ruma mak iha problema, Primeiru-Ministru mós dehan ba h’´u ba karik hateten ba sira liu-liu Autoridade sira serbisu badinas, serbisu maka’ás, Oé-cusse merese duni ita nia atensaun espesial,” Xefe Estadu hateten.

Ramos-Horta haktuir, ho laran no fuan mak  vizita ema ki’ak, difisensia, komunidade sira  iha RAEOA hodi bele haré mós inisiativa Prezidente Repúblika halo, kona-bá dapur ba povu iha Oé-Cusse, ema hamutuk 400 mak programa Prezidente fó, maibe madre sira mak halo jestaun, haré mós inisiativa seluk sidadaun ida husi Filipina, tulun Autoridade Oé-Cusse hodi hakiak manu rade no fahi ho susessu boot hodi fa’an ba autoridade no  merenda Eskolár.

Animál sira ne’ebé haki’ak mak hanesan fahi no manu rade hodi bele hamenus importasaun hahán  husi rai-li’ur tanba manu rade nia tolun di’ak liu manu tolun bai-bain  no nia na’an fresku loos, la’ós naan husi Brasil ne’e mai husi dook  no tmepu barak nia laran mak bele to’o Timor. Tamba ne’e Governu tenke tau atensaun di’ak hodi apoiu programa ida ne’e atu bele iha viabilidade dia’k ba hahan ba labarik no komunidade sira bele sosa.

Prezidente Repúblika, José Ramos-Horta ho  delegasaun ba haré direita sentru kolesaun pre-fabrika Bambu ne’ebé bele sai merkadu alternativa ba povu Oé-Cusse Ambeno ne’ebé lokaliza iha Aldeia Oefoco, Suku Costa, Pante Makasar.

Xefe Estadu kontinua ba iha aldeia Farubisae, Suku Bobokasa, Pante Makasar, hodi distribui manu rade ba ema ho difisensia sira hodi haki’ak, nune’e ba futuru fa’an hodi sustenta moris loro-loron nian.

Prezidente Repúblika mós hakat ba vizita komunidade sira ne’ebé haki’ak fahi A iha Aldeia Makelab, Suku Taiboco,  Pante Makasar, no kontinua ba haré manu rade ne’ebe komunidade sira hakiak iha Aldei Tulaika Suku Lifau, Sub-Reziaun Pante Makasar.

Rohan husi vizita sira ne’e, Prezidente Repúblika ba haré Dapur Prezidente ba labarik sira iha Aldeia Nefobai, Suku lifau, Sub-Reziaun pante makasar.

RAEOA ho kapitál Pante Makasar, iha sub-rejiaun haat hanesan Pante Makasar, Nitibe, Oesilo no Passabe ho totál área 550.91 km², iha suku hamutuk 20 no aldeia 64 ho totál populasaun 80,399 no maioria povu atoni koalia lian Baikeno, Tetum no mós ko’alia lian Melayu.

Jornalista: Elio dos Santos