Governu Sei Fó Sansaun no Deporta Sidadaun Estranjeiru Uza Vistu Turista Halo Servisu Komersiál iha Timor-Leste

Servisu Migrasan asegura sidadaun estranjeiru feto na’in-lima iha fatin karaoke ida iha área Hudi Laran, Bairu-Pite, Díli, Tersa-madrugada 11 Agostu 2026.

Díli, 12  Agostu  2026 (RAFA)- Ministru Interiór (MI), Francisco da Costa Guterres, hatete, Governu sei fó sansaun no deporta ba sidadaun estranjeiru uza vistu turista halo servisu komersiál iha Timor-Leste no bandu tama hikas mai Teritoriu Nasionál durante tinan-10.

Ministru Francisco da Costa Guterres esplika, Timor-Leste aplika  free viza ka bolu visa on arrival signifiká  sidadaun estranjeiru sira  to’o ona iha aeroportu Timor-Leste nian mak foin fó viza ba sira  hodi bele tama mai Timor-Leste no bele hela durante loron 30 nia laran no la  halo tán extende.

“Ita halo fiskalizasaun bei-beik ona tanba ita haré katak balu uza sala vistu,  komú ita uza visa on arrival  nia mai iha ne’e uza sala, invez nia mai para turizmu haré buat ruma mai halo fali servisu. Entaun ita buka tuir hotu, ne’e prontu agora ita buka para tenke tau loos buat sira ne’e hotu,” Ministru Interíor Francisco da Costa Guterres hateten.

Governante ne´e afirma governu liu husi Servisu Migrasaun no parte kompetente hotu sei halo servisu ho másimu hodi asegura sidadaun estranjeiru ne´ebé hela iha teritoriu Timor-Leste labele viola vistu no regra sira ne’ebé vigora iha País ne’e.

“Ita deporta fila hotu depois fó sansaun ba sira katak durante tinan 10 sira labele mai ita nia rai tanba sira uza sala vistu ida-ne’e mak agora ita halo ita aplika ba sira sira ne’ebé ita deporta sai hasai hotu tinan 10 la tama Timor,” Ministru Interiór ne’e subliña.

Membru Governu ne´e subliña, ko’alia ona ho Ministériu Públiku ba kazu sira ne’ebé la’ós boot  involve husi sidadaun estranjeiru bainhira apliká de’it koasaun ba sira bainhira autór sira selu hotu ona koasaun bele  deporta fila no labele husik hela tán iha Timor-Leste.

Jornalista : Zita Menezes