Ministériu Públiku Hahú Loke Prosesu Eleisaun Ba Reprezentante iha CNE

Imajen/Espesiál

Díli, 12 Agostu 2026 (RAFA)— Ministériu Públiku (MP) hahú loke ona prosesu eleisaun bá membru efetivu no membru suplente ne’ebé sei reprezenta majistradu Ministériu Públiku iha Komisaun Nasionál Eleisaun (CNE, sigla portugés).

Dokumentu ne’ebé RAFA asesu husi Gabinete Ministériu Públiku, Kuarta-ne’e, hatudu katak, prosesu ne’e hahú tuir despaxu númeru 96/PGR/2026, ne’ebé Prokuradór-Jerál Repúblika, Nelson de Carvalho, emite iha loron 07 fulan-Agostu 2026.

Iha despaxu ne’e, deskrevee mandatu membru efetivu no membru suplente atual, Domingos Barreto no Napoleão Soares da Silva, maka  eleitu husi Majistradu Ministériu Públiku, sei remata iha loron 16  fulan-Agostu 2026.

Tanba ne’e, atu loke prosesu eleisaun ba reprezentante foun, atu asegura kontinuidade reprezentasaun Ministériu Públiku iha CNE no garante funsionamentu regular órgaun ne’e, membru efetivu no membru suplente sei reprezenta Magistradu Ministériu Públiku iha CNE  sei eleitu husi sira-nia  membru Magistradu, ho mandatu tinan lima.

Dokumentu ofisiál kandidatura tenke aprezenta liuhusi pedidu ne’ebé dirije ba Prezidente Komisaun Eleitorál, no tenke aprezenta antes ka to’o  loron 31 fulan-Agostu 2026.

Eleisaun sei hala’o iha loron 16 fulan-Setembru 2026, tuku 10 dadeer, iha sala reuniaun Prokuradoria-Jerál Repúblika, iha Avenida D. Ricardo da Silva, nu. 1943-2015, Bispo Díli, antiga Rua Mártires da Pátria, Díli.

Atu garante prosesu ne’e lao ho regularidade, transparénsia no demokratizasaun, Ministériu Públiku forma ona Komisaun Eleitoral. Komisaun ne’e sei prezide husi Angelina Joanina Saldanha, ho membru Domingos Gouveia Barreto no Gustavo Augusto da Silva Moreira.

Enkuantu Meza Assembleia de Votu sei prezide husi Zélia Trindade, ho membru Lídia Soares no Ernesto Brito Seixas. Meza ne’e sei responsavel ba organizasaun no funsionamentu regular husi prosesu votasaun.

Konsellu  Superior  Ministériu Públiku mós públika lista magistradu Ministériu Públiku ne’ebé iha efetividade funsaun no kapasidade eleitoral hamutuk na’in- 42

Prosesu eleisaun ba membru foun Komisaun Nasionál Eleisaun ne’e sei hala’o tuir dispozisaun Lei nu. 5/2006, ho alterasaun husi Lei Nu. 6/2011, Lei Nu. 7/2016  no Lei Nu.16/2021.

Jornalista: Marcelino Tomae