Kazu Scam Call Centre City-8, Tribunál Aplika Prizaun Preventiva Ba Arguidu Ne’ebé Tenta Halai Husi TL

Autoridade segurana sira akompaña arguidu ida husi kazu scam call centre iha Cety-8 ba kumpre prizaun preventiva, Tersa 11 Agostu 2026.

Díli, 11 Agostu 2026 (RAFA)– Tribunál Judisiál Primeira Instánsia Díli (TJPID), Tersa-ne’e, liuhosi julgamentu primeira interogátoriu halo alterasaun ba medida haat antes no aplika hikas medida Prizaun Preventiva hasoru arguidu ida ne’ebé tenta halai  sai husi territóriu Timor-Leste.

Arguidu ne’e  eskobre  no deteta husi Polísia Sientífika Investigasaun Kriminál (PCIC-sigla portugés) iha Sábadu, foin lalais ne’e, iha Aeroportu Internasionál Prezidente Nicolau Lobato (AINL) atu halai sai husi territóriu Timor-Leste.

Arguidu refere envolve  iha  rede scam call centre ne’ebé antes ne’e Polísia Sientífiku Ivestigasaun Kriminál (PCIC) detein iha otél City-8 hamutuk ho nia maluk sira seluk na’in -32.

Durante Julgamentu Prirmeiru Interogátoriu, arguidu aprezenta razaun ba tribunál katak la’ós atu halai ses husi prosesu justisa, maibé atu  bá vizita família iha Xina.

Hafoin  rona tiha arguidu, Ministériu Públiku (MP) solisita ba Tribunál atu halo alterasaun ba medida ne’ebé antes aplika kontra arguidu.

Ministériu Públiku akuza arguidu sira bá krime asosiasaun kriminoza, burla informátika, esplorasaun bá jogu ilísitiu, brankeamentu kapitál, ne’ebé previstu no punidu iha kódigu penál Timor-Leste

Parte defeza husu  ba Tribunál atu mantein nafatin medida sira ne’ebé antes aplika, maibé bainhira Tribunál iha entendimentu seluk, bele konsidera aumentu valor osan kausaun bá arguidu, envezde halo alterasaun bá medida ne’e.

Tuir  regra medida termu identidade no rezidénsia (TIR), bainhira arguidu ida hakarak halo viajen ka sai husi territóriu Timor-Leste ho períodu la liu loron 15, arguidu la presiza husu autorizasaun bá Ministériu Públiku, tuir kondisaun medida ne’ebé aplika bá nia.

Rona tiha parte hotu, Tribunál liu hosi Juiza prosesu Ana Paula Foneseca konsidera katak  aktu tentativa ne’e hatudu indikasaun, katak arguidu iha intensaun atu halai husi prosesu justisa, nune’e medida kausaun ne’ebé aplika anteriormente konsidera la sufisiente atu asegura nia prezensa durante prosesu judisiál.

Ho razaun ne’e, Tribunál halo alterasaun ba primeiru medida  aplika antes,  altera bá prizaun preventiva, tanba Tribunál intende katak tentativa arguidu atu sai husi territóriu Timor-Leste bele sai risku ba prosesu investigasaun no julgamentu tuir mai, no bele afeta difikuldade autoridade kompetente atu asegura nia prezensa iha prosesu.

Tribunál intende katak alterasaun ba prizaun preventiva ne’e sai medida prevensaun  ida atu asegura katak arguidu sei la halai tan no sei kontinua sujeita bá prosesu justisa to’o tribunál halo desizaun finál.

Antes ne´e, Tribunál liu hosi julgamentu Primeira Interogatoriu aplika medida haat ba arguidu na’in-32 hanesan medida koasaun Termu Identidade Rezidénsia (TIR), medida koasaun aprezentasaun períodika hodi bá aprezenta-an semana ida dala-ida bá eskuadra Polísia ne’ebé mak besik, medida proibisaun auzénsia no medida prestasaun kausaun ho osan US$2,000.00 ba kada arguidu.

Julgamentu primeiru Interogátoriu ne’e prezide husi Juíza Ana Paula Foneseca, Minitériu públiku reprezenta husi Prokuradór João Marques ho Domingos Goveia, no  arguidu hetan asistensia legál husi Advogadu privadu Napoleão de Oliveira Carvalho.

Jornalista: Marcelino Tomae