PM Xanana Konfirma La Demite Ministru Agio Pereira

PM Xanana Gusmão ho Ministru Prezidénsia Konsellu Ministru Hemenegildo Augusto Cabral "Agio Pereira" Alves iha sesaun balun reuniaun Konsellu Ministru iha Palásiu Governu. Imajen/dok.gov.tl

Díli, 11  Agostu  2026 (RAFA.TL)- Primeiru-Ministru (PM) Xanana Gusmão, Tersa-ne’e, konfirma nia parte la demite Augusto Cabral “Agio Perreira” Alves nu’udár Ministru Prezidénsia Konsellu Ministru (MPCM, sigla portugés).

Primeiru-Ministru (PM) Kay Rala Xanana Gusmão hato’o deklarasaun ne´e hodi hatan ba jornalista sira iha Muzeu Rezisténsia, Díli, relasiona ho  karta pedidu membru Parlamentu Nasionál husi Bankada CNRT na’in-31 ne’ebé husu atu Primeiru-Ministru Kay Rala Xanana Gusmão demite Ministru Agio Perreira husi nia kargu.

“Sé mak dehan, ha’u la simu buat ida imi mak hatene, ha’u la simu karta ruma, imi hatene, Bankada ba husu bankada mai husu fali ha’u,” PM Xanana hateten

Iha loron 31 fula-Jullu 2026,  membru Bankada CNRT Natalino dos Santos, konfirma ba jornalista sira katak membru Bankada CNRT na’in-31 assina karta afirmasaun polítika hodi husu Primeiru-Ministru Kay Rala Xanana Gusmão hanesan mós Prezidente Partidu CNRT atu demite Ministru Agio Perreira  husi nia kargu atuál.

Rajaun fundamental membru Bankada CNRT sira  halo karta afirmasaun tanba lamenta tebes ba atitude Ministru Agio Pereira nian hanesan mós kuadru politikú partidu CNRT nian ne’ebé halo nia manifestu hodi dezakredita Governu atuál.

Fó hanoin fali katak Primeiru-Ministru, Kay Rala Xanana Gusmão, liuhosi despaxu ne’ebé asina iha loron 6 fulan-Agostu tinan 2026, iha Díli, determina hodi kria Komisaun Interministeriál Siberseguransa no Dijitalizasaun Servisu Estadu (CICDE-sigla portugés) ne’ebé responsável ba koordenasaun polítika no inisiativa públika iha área hirak ne’e.

Primeiru-Ministru Xanana Gusmão, nomeia Ministru Prezidénsia Konsellu Ministru, Hermenegildo Augusto “Agio Pereira” nu’udár prezidente  ba komisaun ne’e  ho nia  vise-prezidente maka Ministru Transporte no Komunikasaun, Miguel Marques Gonçalves Manetelu.

Integra mós iha CICDE ne’e Ministru Justisa, Sérgio Hornai,  Ministru Interiór Francisco da Costa Guterres  no Ministru Administrasaun Estatál, Tomas do Rosário Cabral nune’e mós reprezentante sira hosi Servisu Nasionál Intelizénsia Estratéjika, TIC Timor, Polísia Sientífika Investigasaun Kriminál, Unidade Informasaun.

Koordenasaun téknika sei assegura hosi Diretór-Jerál Servisu Nasionál Intelizénsia Estratéjika, ne’ebé hetan apoiu hosi Diretór Ezekutivu TIC Timor. Apoiu administrativu no dokumentál sei responsabiliza hosi Prezidénsia Konsellu Ministru.

Jornalista : Zita Menezes