Komisáriu CAC Informa Ba Prezidente Repúblika Kona-bá Avokasaun Inkeritu Kazu Korrupsaun Ne’ebé MP Halo

Komisáriu CAC, Rui Pereira dos Santos.

Díli, 10 Agostu 2026 (RAFA)- Komisáriu Komisaun Anti-Korrupsaun (CAC, sigla portugés), Rui Pereira dos Santos, hamutuk ho nia ekipa gabinete, Segunda-ne’e, hasoru malu ho Prezidente Repúblika, José Ramos-Horta hodi informa kona-bá servisu CAC nian, liu-liu liga ho avokasaun inkeritu kazu korrupsaun ne’ebé Ministériu Públiku (MP) halo hasoru órgaun polisiál anti korrupsaun nian.

“Imi hatene ona katak, Prezidente Repúblika talves iha informasaun, maibé ohin Komisáriu mai atu refreska fila-fali ba Xefe Estadu kona-bá kazu sira ne’ebé avoka husi Prokuradór Jerál Repéblika (PGR). Tanba ita nia PGR ne’e Prezidente Repúblika mak nomeia no fó posse tamba ne’e ami mai informa,” Komisáriu CAC, Rui Pereira, informa ba jornalista sira iha Palásiu Prezidensiál.

Nia esplika ba oin ne’e CAC espera katak, Ministériu Públiku, PCIC, polísia sira no instituisaun estadu sira tenke  servisu hamutuk atu lori rai ne’e ba oin, la’ós atu trava malu.

CAC mós depois avoka prosesu ne’e, CAC haruka ona partispasaun ba iha Minsitériu Públiku iha kazu ualu foun ne’e mós delegasaun seidauk mai. Espera katak hafoin sorumutu ho Xefe Estadu  no PGR  ho Xefe Estadu bele iha hanoin pozitivu, tenke servisu hamutuk atu lori rai ne’e ba oin. “Ha’u laiha problema pesoál ka partikulár ho PGR Nelson de Carvalho, ami ne’e maun-alin servisu hamutuk tinan naruk,” nia informa.

Iha loron 03 fulan-Fevereiru tinan 2026, Prokuradór Jerál Repúblika (PGR), Nelson de Carvalho hasai despaixu ida hodi foti fila-fali (avoka) prosesu inkéritu kazu korrupsaun ne’ebé antes ne’e delega ona ba Komisaun Anti-Korrupsaun (CAC).

Desizaun ne’e hamosu polémika no preokupasaun husi Komisáriu CAC, Rui Pereira dos Santos tanba prejudika serbisu investigasaun kriminál, maski nune’e entidade rua ne’e halo ona komunikasaun hodi buka solusaun.

Jornalista : Cristina Ximenes