Polémika Jet Privadu, PR Hateten Ema Sira Uza Nia Naran Tenke Esklarese

Prezidente Repúblika, José Ramos-Horta.

Díli, 10 Agostu 2026 (RAFA)- Prezidente Repúblika (PR), José Ramos-Horta, hateten ema sira uza nia naran hodi autoriza aviaun Jet Privadu ho tipu Cessna Citation 700 Longitude (C700)  aterra iha Aerportu Internasionál Preizdente Nicolau Lobato, iha loron 01 fulan-Jullu, tinan ne’e, tenke eklarese ba parte kompetente sira.

“Kona-bá aviaun jet privadu ne’e, ha’u la  bolu aviaun ne’e mai. Ha’u la hatene ema ne’ebé atu sa’e aviaun ba li’ur, ha’u la hatene. Agora se mak uza ha’u nia naran, ema sira ne’e mak tenke esklarese, tanbasá mak uza fali ha’u nia naran,” Prezidente Repúblika José Ramos-Horta hateten hodi responde jornalista sira iha Palásiu Prezidensiál, Segunda-ne’e.

Ba polémika ne’e, Ministériu Públiku rona ona deklarasuan husi ema na’in-14 no konstitui ona ema na’in-haat (4) hanesan arguidu. Nune’e, Xefe Estadu hateten nia parte la fó komentáriu ba prosesu  inkéritu ne’ebé Ministériu Públiku iha no tenke ba ko’alia ho Prokuradór Jerál Repúblika.

Prezidente Repúblika hatutan, baibain sé nia presiza ema ruma, boot ruma husi li’ur mai, presiza iha kontaktu, ne’e mós la’ós Xefe Estadu nia nivél atu autoriza ka la autoriza. Tamba ne’e Xefe Estadu kontinua husu órgaun judisiál atu mantein halo servisu ho independente ho parsiál no iha relatóriu pre-lemináriu halo tiha ona, tanba uza Prezidente Repúblika nia naran.

“Sé mak uza ne’e komete krime ida. Ne’e mak ba iha PGR nia mandatu, nia responsabilidade, depois mak sira rasik mak tenke esplika, podeser sira mós la hatene,” Ramos-Horta tenik.

Tuir informasaun ne’ebé  RAFA rekolla husi fontes sira iha Ministériu Públiku (MP),  Sabádu-ne’e hatete, Ministériu Públiku halo ona prosesu  inkéritu ba  entidade Timoroan na’in-14 , no husi rezultadu inkéritu ne’e, na’in-haat konstitui hanesan arguidu, enkuantu sira seluk hanesan testemuña.

Fontes ne’e informa agora ferias Judisiál fulan ida, kazu ne’e suspende  hela  Minitériu Públiku iha  Gabinte Sentrál Kombate Korupsaun no Kriminalidade.

Tuir informasaun Ministériu Públiku nian katak Ministériu Públiku imputa krime tolu ba  arguidu na’in-haat mak hanesan Falsifikasaun dokumentu, notasaun téknika no burla agravadu, ne’ebé previstu no punidu iha artigu-267 no 303 kódigu penál Timor-Leste.

Pesoál na’in-14 ne’ebé presta ona deklarasaun iha prosesu inkériu iha MP inklui mós iha SNI (Servisu Nasionál Intelijénsia)  mai husi Palásiu Prezidensiál, Minitériu Negósiu Estranjéiru no Kooperasaun (MNEK), Minitériu Transporte no Komunikasaun (MTK), Autoridade Aviasaun Timor-Leste (AACTL), CEVA Logistics no mós Servisu Migrasaun (SM).

Kompañia CEVA Logistics, momentu ne’ebá,  hanesan ground handling ne’ebé mak trata série tomak husi atividade servisu rai nian iha aeroportu ne’ebé relasiona ho maneja pasajeiru sira, bagajen, karga, korreiu, no mós manutensaun no preparasaun téknika ba aviaun bainhira attera iha AINPL.

Fó hanoin fali katak, iha loron 01 fulan-Jullu 2026,  Aviaun jet privadu ho tipu Cessna Citation 700 Longitude (C700) rejistrasaun Indonézia tun iha Aeroportu Internasionál Prezidente Nicolau Lobato (INPL) ho objetivu ne’ebé la klaru.

Jet privadu sai  husi Aeroportu Halim Perdana Kusuma-Jakarta mai Díli, Timor-Leste no tempu ne’ebá tun iha Aeroportu INPL hale’u tuku 17:15 Otl.

Jornalista: Cristina Ximenes