Kazu Jet Privadu, Ministériu Públiku Konstitui Ona Arguidu Na’in-Haat

Aviaun Jet privadu ho tipu Cessna Citation 700 Longitude (C700) ne'ebé iha dokumentu pedidu aterrasaun iha AIPNTL utiliza Prezidente Repúblika, 01 fulan-Jullu 2026. Imajen/supply

Díli, 08 Agostu 2026, (RAFA)- Ministériu Públiku (MP) konstitui ona arguidu na’in-haat ba kazu jet privadu ne’ebé utiliza naran Prezidente Repúblika nian iha dokumentu hodi autoriza aterra iha Aeroportu Internasionál Prezidente Nicolau Lobato, iha Kuarta 01 fulan-Jullu tinan 2026.

Aviaun jet privadu ho tipu Cessna Citation 700 Longitude (C700) rejistrasaun  Indonézia sai polénika no hamosu dúvida tanba ministériu kompetente sira, hanesan Ministériu Negósiu Estranjeiru (MNEK) submete pedidu aterrazen ba  Ministériu Transporte no Komunikasaun (MTK) ho rajaun katak transporta bainaka Prezidente Repúblika nian, maibé realidade Prezidente Repúblika laiha koñesimentu ba bainaka sira ne’e inklui jet privadu ne’e rasik.

Fontes iha Ministériu Públiku ba RAFA Sábadu-ne’e informa katak iha prosesu investigasaun parte Ministériu Públiku arolla  ema  na’in-14 hodi presta deklarasaun no husi rezultadu investigasaun ne’e,  Minitériu Públiku konstitui  arguidu na’in-haat.

Fontes ne’e kofirma katak daudaun ne’e Tribunál sei ferias Judisiál, tanba ne’e prosesu ba kazu ne’e sei pendente iha  Gabinte Sentrál Kombate Korrupsaun no Kriminalidade, Ministériu Públiku.

“Tanba ferias Judisiál, ita (MP-red) suspende hela  kazu ne’e, Gabinete Ministériu Públiku,  prosesu inkéritu rona hotu ona ema hamutuk na’in-14 no konstitui ona na’in-haat hanesan arguidu no sira seluk ne’e testemuña,” fontes MP ne’e hateten.

Ministériu Públiku imputa krime tolu bá  arguidu na’in-haat ne’e mak hanesan falsifikasaun dokumentu, notasaun téknika no burla agravadu, ne’ebé previstu no punidu iha artigu-267 no artigu 303 kódigu penál Timor-Leste.

Fó hanoin fali katak polémika aterrasaun jet privadu ne’e, parte kompetente sira, hanesan Servisu Nasionál Intelijénsia (SNI) ho Ministériu Públiku bolu ona pesoál na’in-14,  husi Palásiu Prezidensiál, Ministériu Negósiu Estranjéiru no Kooperasaun (MNEK), no Ministériu Transporte no Komunikasaun (MTK),  Autoridade Aviasaun Timor-Leste (AACTL), empreza CEVA Logistics no mós Servisu Migrasaun (SM).

Jet privadu ne’e tuir informasaun katak sai  husi Aeroportu Halim Perdana Kusuma-Jakarta mai Díli, Timor-Leste no aterra iha Aeroportu INPL hale’u 17:15 Otl, 01 fulan-Jullu 2026.

Jornalista: Marcelino Tomae