PNTL Koloka Efetivu Na’in-900-Resin Fó Seguransa Ba Eventu Díli Internasionál Maratona 2026

Polísia Tránzitu asegura estrada sira ne'ebé sai hanesan rota ba atleta sira iha Díli Internasionál Maratona 2026.

Díli, 08 Agostu 2026 (RAFA)—Komandu Jerál Polísia Nasionál Timor-Leste (PNTL) koloka sira-nia membru (efetivu) na’in-900-resin hodi fó seguransa ba eventu  Díli Internasionál Maratona (DIM) 2026.

Komandante Operasaun PNTL Munisípiu Dili, Superintendente Asistente Polísia Luis Amaral, ba  RAFA iha  Palásiu Prezidensiál, Díli  Sabádu-ne’e,  hateten  Komandu Munisípiu  Díli ho Unidade Espesiál Polísia (UEP) hetan orientasaun husi Komandu Jerál PNTL atu garante seguransa durante atividade desportiva Díli internasionál Maritona.

“Ha’u hanoin Komanndu Munisípiu Díli hetan orientasaun husi Komandu Jerál,  no mós unidade espesial  atu asegura Dili Internasionál  Maratona  ne’ebé hala’o iha ne’e hahú kedas husi tuku  05:00  dader to’o remata ursida kalan. Polísia Munisípiu Díli ita hatún nia ejersitu na’in-300 resin,  Kuater jerál  ho membru UEP hamutuk  na’in-600 fó apoiu seguransa ba eventu internasionál ne’e,” Superintendente Asistente Polísia Luis Amaral hatete.

Nia hatutan, estrada públiku taka  temporária    husi  Fatuhad-ETDA  no parte sira ne’ebé maratona liubá no antes  atividade hala’o, PNTL fó ona aviza  bá públiku kona-bá  estrada sira ne’ebé sei taka no dalan alternativu ne’ebé bele uza.

“Horsehik kedas ha’u aviza tiha oan, dalan ne’ebé sira liubá, só loke asesu iha parte klaran, Bairru-Pité, maibé ita haré katak ohin  engramentu mós ladún,  tanba ita fó sai ona avizu iha loron rua bá liubá tanba ne’e ita haree katak engramentu ladún iha,”  nia hateten.

Nia informa autoridade seguransa  koloka kedas bá fatin hotu-hotu,  no   situasaun  to’o agora halo monitorizasaun iha fatin-fatin, hatudu transporte públiku no privadu sira  tuir parte ne’ebé alternativa sira atu liubá,

Observasaun RAFA nian terenu  nota katak, diresaun  husi Hudi-Laran bá Igreja Katedral Díli mak  mosu  engramentu maka’ás  tanba transporte públiku  (mikrolete) 03,  05, 06 , 07 ho 010  inklui  transporte privadu  movimentu  hamutuk iha diresaun refere. Maibé  autoridade seguransa sira kontinua mobiliza hodi kontrola engrafamentu no trafiku ne’ebé akontese iha área refere.

Iha Parte tasi-ibun  Estrada protokolu blokia temporária husi kedas  Embaixada Japaun nian no mós  diresaun klaran Meskita An-Núr oin.

Jornalista: Marcelino Tomae