F-FDTL Hatun Hikas Ró Jaco Ba Tasi Laran Hodi Haforsa Patrullamentu Marítimu

Hafoin manutensaun, ró patrullamentu NRTL Jaco hatun fali ba tasi iha área Behau, Munisípiu Manatuto, Sesta, 07 Agostu 2026.

Manatuto, 07 Agostu 2026 (RAFA) – Ministru Defeza, Kontra Almirante Donaciano do Rosário da Costa Gomes “Pedro Klamar Fuik” hamutuk ho Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingus Raul “Falur Rate Laek”, no Komandu Komponente Naval F-FDTL, Sesta-ne’e, ofisialmente hatun ró patrullamentu NRTL Jaco ba tasi iha área Behau, Munisípiu Manatuto, hafoin manutensaun.

Tenente Jenerál Domingus Raul “Falur Rate Laek”, iha nia diskursu hato’o agradesimentu ba IX Governu Konstitusionál, liuhusi Ministru Defeza, tanba nia kompromisu no esforsu atu realiza manutensaun ba NRTL Jaco.

Falur Rate Laek hateten medida ida-ne’e importante atu haforsa prontidaun operasionál Komponente Naval, hasa’e kapasidade patrullamentu marítimu, proteje soberania tasi Timor-Leste no kombate atividade ilegál hanesan peska ilegál, tráfiku ema, kontrabandu no krime transnasionál seluk.

“Ha’u hakarak hato’o ha’u-nia apresiasaun kle’an ba IX Governu Konstitusionál, liu husi Sua Exelénsia Ministru Defeza, ba esforsu inkansável no determinasaun polítika ne’ebé permite kompleta manutensaun NRTL Jaco hafoin períodu imobilizasaun ne’ebé naruk. Hatun hikas ró ida-ne’e ba tasi signifika fila ba Estadu kapasidade estratéjika ida atu marka prezensa iha ita-nia soberania marítima loron-loron,” Tenente Jenerál Falur Rate Laek afirma.

Komandante Komponente Naval, Komodoro Higino das Neves, mós hato’o apresiasaun ba Ministru Defeza, ekipa tékniku no membru F-FDTL hotu-hotu ne’ebé kontribui iha prosesu manutensaun ró nian.

“Ró Jaco la’ós de’it plataforma operasionál ida, maibé simboliza kapasidade Estadu Timor-Leste atu marka nia prezensa iha tasi, hala’o patrullamentu marítimu, apoia operasaun seguransa no responde ba emerjénsia no ameasa marítima sira,” Komodoro Higino das Neves tenik.

Durante períodu manutensaun, ekipa tékniku hala’o serbisu komprensivu atu restaura kondisaun operasionál ró nian, inklui hadi’a sistema no ekipamentu importante sira, hodi asegura katak ró bele opera ho seguru, efisiente no tuir padraun tékniku ne’ebé aas.

Iha tinan 2010 Governu Timor-Leste simu ró patrullamentu Klase Shanghai rua husi Repúblika Populár Xina, ho naran NRTL Jaco no NRTL Betano.

Iha loron 11 fulan-Juñu 2010, ró rua ne’e ofisialmente entrega ba Komponente Naval F-FDTL iha Portu Díli.

Desde ne’ebá, NRTL Jaco no NRTL Betano hala’o operasaun patrullamentu iha kosta norte, rejiaun orientál no tasi sul Timor-Leste, no kontribui ba deteta no prevene atividade peska ilegál no violasaun seluk iha área marítima nasional.

Iha tinan 2015, Governu realiza manutensaun dahuluk ba ró rua ne’e hafoin tinan lima hala’o servisu operasionál. Maibé, durante tinan sira tuir mai, ró sira enfrenta problema tékniku oioin ne’ebé la hetan manutensaun adekuadu.

Liuhusi prioridade husi IX Governu Konstitusionál, programa restaurasaun hahú ho NRTL Jaco, enkuantu NRTL Betano seidauk funsiona no sei hein manutensaun no reparasaun tuir planu Governu, ne’ebé sei implementa husi kompañia Blue Anchor Engineering husi Xina.

Ho NRTL Jaco fila hikas ba tasi, Governu no F-FDTL espera katak ró ne’e sei fó kontribuisaun boot ba seguransa marítima nasionál, proteje integridade teritoriu tasi Timor-Leste no defende interese estratéjiku nasaun nian.

Jornalista: João Carlos