Ekipa Konjunta Detein Sidadaun Estranjeiru Na’in-15 iha Metiaut Suspeita Rede Scam Call Centre

Ekipa konjunta halo operasaun no detein sidadaun estranjeiru na'in-15 ne'ebé suspeitu ba rede scam call centre iha Metiaut, Díli, Kinta-kalan 06 Agostu 2026.

Díli, 07 Agostu 2026 (RAFA)— Ekipa konjunta Polísia Nasionál  Timor-Leste (PNTL) liu husi Diresaun Servisu Investigasaun Kriminal (DSIK) hamutuk ho Diresaun Servisu Informasaun Polísia (DSIP),  Servisu Migrasaun (SM), Kinta-kalan, halo operasaun no detein sidadaun estranjeiru na’in-15 (mane na’in-12 no feto na’in-3) ne’ebé  suspeita envolve iha rede scam call centre iha área Suku Metiaut, Díli.

Iha operasaun ne’ebé hala’u hahú tuku 20:00 Otl,  ekipa konjunta sira tama rezidénsia ida iha Metiaut iha área Bekari hodi detein sidadaun estranjeiru ho nasionalidade Xia na’in-13 no sidadaun   Filipina na’in-rua.

Observasaun RAFA nian   iha lokal operasaun  no iha uma ida ne’ebé sai alvu operasaun, hatudu katak uma rezidénsia refere instala kadeira hamutuk 50,  meza hamutuk sia (balun sobu ona), no instala mós aparelu STARLINK rua.

Uma  rua mak ema estranjeiru sira ne’e areenda no sira utiliza kuartu hamutuk lima, kada kuartu  instala kama-neen no balun iha kama 12.

Ekipa konjunta identifika sidadaun Xinés na’in-ida ne’ebé lori hahán ba nia maluk hetan mós Karta Kondusaun Timor-Leste nian hodi kondús karreta. Sidadaun estranjeiru husi Xina nia karta kondusaun emitida iha loron 05 fulan-Agostu  2026  no validu  to’o loron 05 fulan-Agostu 2031.

Ekipa konjunta hlao apreensaun mós ba sasán sira hanesan aparelu internet STARLINK rua, telefone seidauk sura, keiboard no sasán seluk ne’ebé sira utiliza ba atividade ilísitu ne’e, inklui foti mós  pasaporte husi sidadaun estranjeiru sira ne’e hamutuk 13,  maibé na’in-rua mak pasaporte la iha liman.

Parte seguransa sira mós halo apreensaun ba  karreta ho marka probox,  númeru matrikula C.12-5xx.TL.

Ekipa konjunta htransporta  sidadaun estranjeiru sira  ba iha edifisiu Diresaun Servisu Investigasaun Kriminál  iha Kuartel Jerál PNTL hodi kontinua prosesu identifikasaun no submeter ba detensaun.

Jornalista: Juvinal Cabral dos Santos