Timor-Leste Halo Estradisaun Ba Sidadaun Xina Na’in-Rua Ne’ebé Tama Lista Red Notice INTERPOL

Timor-Leste halo estradisaun ba Xinés na'in-rua ne'ebé tama lista red notice INTERPOL, Tersa 04 Agostu 2026. Imajen/Servisu Migrasaun

Díli, 04 Agostu 2026 (RAFA.TL) –Servisu Migrasaun Timor-Leste, Tersa-ne’e,  halo estradisaun  ba sidadaun Xina na’in-rua ne’ebé tama iha lista red notice Organizasaun  Polísia Kriminál Internasionál (INTERPOL).

Xinés na’in-rua ne’e, Polísia Sentifika Inverstigasaun  Kriminál (PCIC) kaptura iha Aeroportu Internasionál Prezidente Nicolau Lobato, Díli, iha loron 19 fulan-Jullu tinan 2026.

Servisu Migrasaun Timor-Leste liu hosi koordenasaun ho Embaixada Xina iha Timor-Leste hodi halo estradisaun ba Xinés na’in-rua ne’e atu sira bele fila ba sira-nia nasaun orijen  kumpri sira-nia julgamentu no sentensa.

Prosesu estradisaun ne’e hala’o tuir Lei Migrasaun no prosedimentu legal ne’ebé vigora iha Timor-Leste, liuhusi kooperasaun entre Servisu Migrasaun, Polísia Sientífika Investigasaun Kriminál (PCIC), Embaixada Repúblika Populár Xina iha Timor-Leste no autoridade seguransa Xina.

Diretór Ezekutivu Servisu Migrasaun, Komisáriu Asistente Polísia Jorge Monteiro, hatete katak hafoin  PCIC halo investigasaun no konklui katak sira la envolve iha kazu kriminál ruma iha territóriu Timor-Leste,  maka PCIC entrega sira ba Servisu Migrasaun. Husi ne’ebá, Servisu Migrasaun koordena ho Embaixada Repúblika Populár Xina atu realiza entrega ba autoridade seguransa Xina.

Komisáriu Asistente Polísia Jorge Monteiro, esplika tan katak hafoin prosesu identifikasaun remata, Servisu Migrasaun entrega sidadaun na’in-rua ne’e ba autoridade INTERPOL Xina iha aeroportu hodi kontinua fila ba sira-nia nasaun orijen ho aviaun komersiál Aero Dili.

Jorge Monteiro hateten katak Servisu Migrasaun  kontinua reforsa kontrolu rigorozu ba entrada no saída sidadaun estranjeiru iha fronteira Timor-Leste atu garante seguransa públika no proteje soberania RDTL.

Autoridade sira mós apela ba komunidade atu respeita lei migrasaun Timor-Leste no koopera ho instituisaun seguransa bainhira iha informasaun kona-bá atividade ilegál ne’ebé bele ameasa estabilidade no seguransa nasaun.

Tuir informasaun ne’ebé RAFA.TL hetan hosi fonte ofisiál sira katak, sidadaun Xinés na’in-rua ne’e suspeita no envolve iha kazu kriminál ne’ebé hetan atensaun hosi INTERPOL.

Bainhira sira tama mai Timor-Leste liuhusi Aeroportu Internasionál Prezidenti Nicolau Lobato, PCIC halo kapturasaun no detensaun tanba naran sira mosu iha lista Red Notice INTERPOL.

Jornalista: João Carlos