APORTIL Halo Teste Ba Ró Berlin Ramelau Atraka iha Portu Ataúro

APORTIL ho autoridade kompetente sira halo teste ba Ró Berlin Ramalau atraka iha Portu Ataúro, Segunda 03 Agostu 2026.

Ataúro, 03 Agostu 2026 (RAFA.TL)– Autoridade Portuáriu Timor-Leste (APORTIL) akompaña husi Komisaun Anti-Korrupsaun (CAC siglá portugés), membru Komisaun E Parlamentu Nasionál ne’ebé trata asuntu Infraestrutura ho Polísia Marítima, Segunda-ne’e, halo teste ba Ró Berlin Ramelau sai husi Portu Díli ba  atraka iha Portu Ataúro hodi bele halo operasaun ba-mai Díli-Ataúro.

Bainhira iha Portu Ataúro, Prezidente APORTIL, José de Oliveira Leong, informa, durante ne’e APORTIL servisu hamutuk ho entidade relevante sira planu hodi koko  lori Ró Berlin Ramelau ba atraka iha Portu Ataúro, nune’e bainhira ró Berlin Nakroma ba halo manutensaun ka sa’e doka, Berlin  Ramelau bele substitui halo operasaun ba Díli-Ataúro hodi fasilita movimentu komunidade Ataúro nian.

“Ró Berlin Ramelau mai ne’e  atu  koko took jetidaun ka Portu Ataúro ida agora ne’e, tanba ha’u hanoin ita hotu mai haré kondisaun Portu la sufisiénte para atu ró ida boot ne’e bele atraka, ne’ebé ami lakohi mai mesak, ami komunika ho parte relevante sira mai hamutuk hotu hodi haré,” Prezidente APORTIL José de Oliveira Leong hateten.

APORTIL  mak konvida membru Parlamentu Nasionál husi Komisaun E, Komisáriu Komisaun Anti-Korrupsaun (CAC ) no Polísia Marítima no entidade relevante sira seluk hotu-hotu mai haré atu sira mós iha relatóriu hato’o ba Governu no Ministru Transporte no Komunikasaun (MTK) hodi bele haré prosesu ba oin no buka solusaun.

Tuir APORTIL nia haré katak dezenvolvimentu iha Ataúro  presiza ró boot atu tranporta sasán  husi Díli tanba durante ne’e uza Ró  Berlin Nakroma tula sasán todan sira uituan de’it.

Depois koko tiha ró Berlin Ramelau, APORTIL seidauk iha dezisaun finál kona-bá Ró  Berlin Ramelau atu halo operasaun iha Ataúro ka lae, tanba  APORTIL sei husu relatóriu husi Kapitaun Ró Berlin Ramelau, diterór Kabutajen no tekniku sira antes foti desizaun.

Nia hateten bainhira APORTIL iha ona dezisaun mak sei informa fali ba públiku  kona-bá orariu operasaun Ró Berlin Ramelau no nia presu ba mai Díli-Ataúro.

Membru Komisaun E-PN, Deputada Irene Gonjaza ne’ebé halo observasaun direta ba teste Ró Berlin Ramelau atraka iha Portu Ataúro haktuir, Ró Berlin Ramelau boot ne’ebé ho kondisaun di’ak no bele akumula pasajeiru sira hamutuk 300-resin.

“Ita rasik haré ho matan katak ró ne’e atu atraka susar tebes no prosesu kle’ur tebes ne’ebé hanesan ami husi komisaun E ami mós haré ona no  ami sei fó rekomenda ba Governu  atu oinsá  bele hadi’a di’ak liután ita nia Portu Ataúro no bele loke luan tan atu bele Ró Berlin Ramelau mai karik bele atraka ho di’ak,” Deputada Irene Gonjaga hateten.

Komisáriu CAC, Rui dos Santos Perreira fó nia observasaun katak kondisaun Ró Berlin Ramelau di’ak no modernu tanba foin mak halo manutensaun hotu.

“Ita haré kondisaun Portu Ataúro nian ne’e ró boot ida mai para iha rohan ne’e araska loos, depois sorin-sorin tasi ne’e la kle’an nia sinal trafiku ró atu tama mós laiha, tanba ne’e mak sé atu kria kondisaun di’ak ba povu Ataúro atu halo movimentu tenke orsamentu no planu para portu ne’e tenke  halo hodi bele fasilita komunidade iha rai-boot bele mai Ataúro,”  Komisáriu CAC, Rui dos Santos Perreira hateten.

Komisáriu CAC afirma bainhira Portu Ataúro halo foun CAC mós sei mai direta hodi halo monitorizasaun.

Tuir observasaun  RAFA.tl ba fasilidade Ró Berlin Ramelau hanesan kadeira ba pasajeiru sira, hariis fatin, kantina, AC ho fasilidade seluk ho kondisaun di’ak hotu.

Jornalista : Zita Menezes