TL ho Xina Asina Akordu Konstrusaun Jardin iha Área Kosteira Farol To’o Praia dos Coquiros

Vise-Primeiru-Ministru no Ministru Koordenadór ba Assuntu Ekonomiku, Ministru Turizmu no Ambiente, Francisco Kalbuadi Lay, asina akordu ho Embaixadora Wang Wenli ba implementasaun projetu konstrusaun jardin iha área Kosteira husi Farol to’o Praia dos Coquiros, Díli, Segunda 03 Agostu 2026.

Díli, 03 Agostu 2026 (RAFA. TL)- Governu Timor-Leste liu hosi Vise-Primeiru-Ministru no Ministru Koordenadór ba Assuntu Ekonomiku, Ministru Turizmu no Ambiente, Francisco Kalbuadi Lay, Segunda-ne’e, ofisialmente asina akordu ho Embaixadora Wang Wenli ne’ebé reprezenta Governu Xina ba implementasaun projetu konstrusaun jardin iha área Kosteira husi Farol to’o Praia dos Coquiros, Díli, ho naruk kilometru 2.68.

Tuir akoordu ba implementasaun ba  jardin ne’e ne’ebé lansa ona iha tinan kotuk, sei hahú konstrusaun iha fulan-Outubru, tinan ne’e,  no tuir estimasaun sei remata iha tinan 2028 molok Timor-Leste assume responsabiloidade hanesan Prezidénsia ASEAN iha Tinan 2029.

Vise-Primeiru-Ministru no Ministru Koordenadór ba Assuntu Ekonomiku, Ministru Turizmu no Ambiente, Francisco Kalbuadi Lay, esplika projetu konstrusaun jardin ne’e oferta husi Governu Xina liu husi esforsu ne’ebé Embaxadora Wang Wenli iha atu halo área kosteiru ne’e sai fatin ida furak no kmanek.

“Ita hanoin katak se bele lalais, fulan-Outubru, bele komesa no Embaixadora  Wang Wenli hatete katak sira sei tenta para projetu ne’e sei hotu iha tinan 2028 molok ita simu knar ne’ebé previleziu mais todan iha 2029 ba prezidénsia ASEAN nian,” Francisco Kalbuadi Lay informa.

Vise-Primeiru-Ministru lori Governu Timor-Leste nia naran hato’o agradesimentu ba Governu Sentral Xina liu husi Embaixadora  Wang Wenli ba esforsu no apoiu tomak to’o projetu ne’e tama ba faze implementasaun.

Governante ne´e mós subliña parte Governu Timor-Leste mós haruka ona tékniku Timoroan hamutuk na’in-ualu ba Xina-Beijing hodi hamutuk ho tékniku sira husi Xina oinsá bele implementa projetu Jardin Kosteira ne’e.

Embaixadora Wang Wenli,  kontente tebes bele hasoru jornalista sira husi media nasionál sira, no kontenti tebes atu deside akordu tékniku ho Vise-Primeiru-Ministru Francisco  Kalbuadi Lay kona-bá esplorasaun dezeñu faze inisiál kompleta ona ho susesu.

Diplomata ne’e hatutan, akordu sira-ne’e negosia entre Embaixada Xina no autoridade kompetitiva sira, inklui ministeriu indústria turizmu no protesaun ambientál no asuntu Ekonómiku sira ne’ebé maka lidera hosi vise-primeiru-ministru no mós hetan apoiu no orientasaun hosi Prezidente Repúblika, José Ramos-Horta durante nia vizita iha fulan-Agostu 2024.

“Ami hanoin katak projetu ida-ne’e sei hetan benefísiu barak ba hadi’a paizajen sidade nian iha Díli no hadi’a moris hosi ema risku sira ekipa nian. Projetu ne’e sei sai hanesan plataforma ida atu luta hasoru erozaun, tanba ida-ne’e hanesan enkuadramentu ida, no ida-ne’e mós sei sai hanesan fatin ida ba ema sira atu halimar,” Embaixadora Wang Wenli hateten.

Embaixadora ne’e sublña konstrusaun ba jardin ne’e kobre área ho naruk kilometru 2.68 no ida-ne’e kobre tasi-ibun hotu ne’ebé maka seidauk hadi’a antes.

Xina sei kontinua servisu besik ho Governu Timor-Leste atu garante katak projetu sei hatudu progresu pozitivu no termina molok Timor-Leste nia prezidensia ba ASEAN iha 2029.

Jornalista: João Carlos