Hametin Vijilánsia Kontra Jogu Ilísitu, PNTL ho PAM Díli Husu Lider Komunitáriu Kontrola Movimentu Ema Estránjeiru iha Bairu sira

PNTL Munisípiu Díli, PAM Díli ho Servisu Migrasaun hala’o enkontru alargada ho Polísia Eskuadra sira, Administradór Postu-Administrativu no Autoridade lokál sira hodi halo kontrolu ba movimentu sidadaun estránjeiru sira iha Díli.

Díli, 03 Agostu 2026 (RAFA. TL) – Polísia Nasionál Timor-Leste (PNTL) hamutuk ho Autoridade  Munisípiu Díli, no Servisu Migrasaun, Segunda-ne’e, hala’o enkontru alargada ho polísia eskuadra sira, administradór postu-administartivu no autoridade lokál sira, hodi ko’alia no  introdus medida sira vijilánsia  iha bairru sira ba prevene atividade ilísitu scam call centre  ne’ebé sai ona preokupasaun nasionál inklui preokupasaun global.

Komandante PNTL Munisípiu Díli, Komisáriu Asitente Polísia Orlando Gomes, husu ba autoridade suku no xefe aldeia sira atu kolabora ho Ofisiál Polísia Suku (OPS) atu aumenta kontrolu no monitorizasaun ba sidadaun estránjeiru ne’ebé hela ka realiza atividade iha área sira iha Munisípiu Díli.

“Ita bolu  Xefe Suku no Ofisiál Polísia Suku sira atu ativa servisu iha suku hodi kontrola ema estránjeiru sira ne´ebé mak hela iha otél sira, rezidénsia privadu, no apartamentu sira, hodi hamutuk kombate atividade ilísitu,” Komisáriu Asitente Polísia Orlando Gomes informa iha salaun enkontru PNTL Munisípiu Díli.

Komisáriu Asistente Polísia  ne´e subliña papel autoridade suku importante tebes tanba sira mak hatene diretamente movimentu ema ne’ebé tama-sai iha komunidade nia leet. Tanba ne’e, PNTL husu atu halo rejistu ba ema estránjeiru ne’ebé aluga uma, hela temporáriu ka permanente, no informa lalais ba polísia bainhira haree movimentu suspeitu.

Prezidente Autoriedade Munisípiu Díli, Francisco dos Santos, esklarese katak kontrolu ne’e la’ós atu halo diskriminasaun ba sidadaun estránjeiru, maibé atu asegura katak sira hotu kumpre regra migrasaun no regulamentu lokal ne’ebé vigora iha Timor-Leste.

“Ha’u fó ona mensajen ba iha lider komunitáriu  sira, liu-liu xefe suku, xefe aldeia, delegadu suku no Ofisiál Polísia Suku sira, tenke maksimiza sira nia rekursu ne’ebé mak iha para atu bele halo operasaun konjunta, tanba sira mós iha poder. Bainhira deskonfia iha fatin ruma, sira tenke ba iha ne’eba importante maka komunikasaun atu tama iha fatin ida uza lingua ne´ebé mak diak para labele provoka fali situasaun,” hatete Francisco dos Santos.

Diretór Ezekutivu Servisu Migrasaun, Komisáriu Asistente Polísia,  Jorge Monteiro  fó hanoin ba lider komunátiru ho Ofisial Suku atu tau atensaun  ema estranjeiru sira nia movimentu.

“Movimentu ema estranjeiru sira ne’ebé ita suspeita, alende ne mos sai mos hanesan aspetu prinsipal ne´ebé ke sai atensaun ba iha ita nia autoriedade sira, iha nivel suku espesialmente mos ba aldeia nomos ba Ofisial Polísia Suku. Relasiona ho empreza foun sira ne´ebé iha sira nia aktividade la klaru iha ita nia aldeia, suku, ne´ebé ita ita iha responsabilidade atu hare aspetu sira ne’e,” Komisáriu Asistente Polísia Jorge Monteiro informa .

Kooperasaun entre autoridade lokál no PNTL sei fasilita identifikasaun ba atividade ne’ebé la tuir lei, inklui kazu scam call centre, okupasaun ilegál, no atividade kriminál seluk.

Autoridade seguransa no PAM Díli husu komunidade atu partisipa ativamente iha esforsu ida-ne’e ho maneira fó informasaun ne’ebé loos no responsavel, no operasaun monitorizasaun ba sidadaun estranjeiru sei kontinua realiza iha área sira ne’ebé konsidera vulneravel, liuliu fatin aluga uma, hotel, apartamentu no edifísiu komersiál sira iha Díli.

Jornalista: João Carlos