Membru Bankada CNRT Na’in-31 Asina Karta Afirmasaun Polítika Husu PM Xanana Ezonera Ministru Agio Perreira

Membru Parlamentu Nasionál husi Bankada CNRT, Natalino dos Santos.

Díli, 31  Jullu  2026 (RAFA.TL)- Membru Bankada CNRT na’in-31 iha Parlamentu Nasionál (PN), konfirmadu  asina karta afirmasaun polítika hodi husu Primeiru-Ministru (PM) Xanana Gusmão hanesan mós Prezidente Partidu CNRT  no  Vise-Primeiru-Ministru  Francisco Kalbuadi Lay  hanesan Sekretáriu Jerál Partidu CNRT hodi ezonera Ministru Prezidénsia Konsellu-Ministru (MPCM) Hermenegildo Augusto “Agio Pereira” Alves tanba Bankada CNRT lamenta ho atitude manifestu ne’ebé divulga iha públiku.

Membru Bankada CNRT, Natalino dos Santos ba jornalista sira iha Parlamentu Nasionál, Sesta-ne’e, konfirma katak  razaun fundamentál husi  dezisaun polítika membru Bankada CNRT  na’in-31 asina karta afirmasaun polítika ne’e tanba  lamenta tebes ba atitude membru Governu ida mai husi kuadru politikú partidu CNRT nian ne’ebé halo nia manifestu hodi dezakredita Governu atuál.

“Hanesan polítiku, Deputadu reprezenta partidu halo polítika iha Parlamentu Nasionál, ami afirma ami nia pozisaun katak karta ne’e bazeia ba ami reafirma katak ami laiha konfiansa ona. Entaun ami halo karta ne’e haruka ba Primeiru-Ministru hanesan  mós Prezidente Partidu CNRT no mós ami haruka ba Sekretáriu Jerál Partidu CNRT, hanesan mós Vise-Primeiru-Ministru, ami   Deputadu na’in-31 halo karta ne’ebá hatudu katak ami afirma ami nia polítika katak la podia kuadru ida hanesan Ministru Agio Perreira halo ida-ne’e,” Deputadu Natalino dos Santos hateten.

Membru Bankada CNRT ne’e hateten tuir loloos Ministru Agio Pereira konfirma sasán sira ne’e,  maibé nia hanesan membru governu ida hasai halo karta dezekredita fali Governu sein faktu no evidénsia.

Nia afirma desizaun ikus  iha Prezidente Partidu CNRT no mós Sekretáriu Jerál Partidu CNRT kualidade hanesan Primeiru-Ministru no Vise Primeiru-Ministru atu halo desizaun tanba sira na’in-rua iha  direitu prerogativu tuir kompeténsia iha estatutu partidu CNRT nian.

“Iha partidu ami lamenta tebes ho atetude karta anonimu ida ne’ebé to’o agora laiha nia verasidade faktu ne’ebé iha. Tanba ne’e iha altura ne’ebá kuandu karta ne’e sai,  Deputadu na’in-31 foti pozisaun. Agora ha’u husu ba ita-boot sira depois manifestu ne’e ema kaer ema ka lae, tanba ida-ne’e mak hatudu katak nia karta ida-ne’e anonimu nia dezekredita hanesan kuadru CNRT no mós hanesan membru Governu dezekredita Governu,” Deputadu Natalino dos Santos afirma tan.

Iha biban ne’e,  RAFA.TL hakat to’o iha Gabinete  Ministru Agio Pereira nian iha Palásiu Governu hodi husu halo entrevista  konfirmasaun ho Ministru Agio Pereira, maibé Ministru Agio Pereira preokupa ho nia servisu.

Tuir informasaun ne’ebé iha katak to’o agora Ministru Agio Pereira kontinua hala’o nia servisu hanesan baibain.

Sai ona hanesan segredu públiku, katak iha fulan-hirak liubá iha ámbitu reuniaun Konsellu Ministru (KM), Ministru Agio Pereira, pronúnsia no divulga dokumentu balun relativa ho krime transnasionál ne’ebé deskonfia envolve parte balun ne’ebé asume knaar importante iha órgaun soberanu RDTL.

Tuir informasaun husi fontes importante sira ba RAFA.TL katak dokumentu ne’e iha relasaun forte ho jogu scam call centre no online scamming ne’ebé autoridade Polísia Timor-Leste desmantela no halo detensuan ba suspeitu sira iha Otél Oé-Upun, Rejiaun Administraitvu Oé-Cusse (RAEOA),  iha 26 fulan-Agostu tinan-2025.

Jornalista : Zita Menezes