Sekretáriu Jerál ASEAN Apresia Timor-Leste Nia Preparasaun Ba Prezidénsia ASEAN iha 2029

Jornalista RAFA.TL, Vito Salvadór, halo entrevista direita ho Sekretáriu Jerál ASEAN, Kao Kim Hourn iha ámbitu ASEAN Mídia Fórum iha Manila-Filipina, Kuarta, 29 Jullu 2026.

Manila, 29 Jullu 2026 (RAFA.TL)- Sekretáriu Jerál ASEAN, Kao Kim Hourn,  apresia ho Timor-Leste nia preparasaun ba prezidénsia ASEAN iha tinan 2029 tanba hatudu progresu di’ak hodi kumpri rekizitu hotu hanesan mebru plenu.

Notísia Relevante: ASEAN Mídia Forum Ba Dala-X, Deskute Asuntu Jeopolítika no Seguransa Enerjétika Inklui Papel Mídia iha Navegasaun Futuru ASEAN

Sekretáriu Jerál ASEAN, Kao Kim Hourn, hato’o apresiasaun iha intrevista direta ida ho  Jornalista RAFA.TL, Vito Salvadór iha ámbitu abertura ASEAN Mídia Forum iha Manila-Filipina, Kuarta-ne’e.

Nia haktuir katak iha fulan-Maiu liubá hetan konvite espesiál husi Estadu no Governu Timor-Leste liu husi Ministeriu Negosiu Estránjeiru no Kooperasaun (MNEK) hodi partisipa iha loron Restaurasaun Independénsia Timor-Leste, 20 Maiu 2026 no halo mós enkontru bilaterál ho Prezidente Republika,  José Ramos-Horta, Primeiru-Ministru Xanana Gusmão no membru governu relevante sira seluk. Nia artisipa  mós iha serimonia lansamentun Sentru Konvensaun Internasionál (ICC) ne’ebé mos hanesan infraestrutura importante ba Timor-Leste bainhira sai hanesan prezidensia ASEAN iha tinan 2029.

“Ha’u hare Timor-Leste sériu tebes iha ASEAN, bazeia ba serbisu ne’ebé ita-boot sira halo ona agora, ita-boot sira iha dalan loos hanesan membru, no foti ona kompromisu ho sériu tebes, partisipa ona iha enkontru sira hotu, ne’ebé importante tebes no hakarak Timor-Leste atu prezide ASEAN iha 2029,” Sekretariu Jerál, Kao Kim Hourn hateten.

Nia hatutan, tinan-ne´e Filipina nu’udar prezidente ASEAN no sei iha simeira ba fulan-Novembru atu seside prezidénsia ASEAN nian ba future, maibé nafatin katak hafoin Filipina sei kontinua ba Singapura iha tinan 2028 ba Tailandia molok kontinua ba Timor-Leste iha tinan 2029.

“Ha’u hanoin rekursu sira la’ós problema ba Timor-Leste tanba ho kompromisu ne’ebé iha hatudu katak imi iha serteza boot bele mobiliza. Ha’u sempre hatete mós katak importante liu mak iha sekretariadu ASEAN ida iha Timor-Leste hanesan fatin servisu ba implementasaun planu sira ASEAN nian,” Kao Kim Hourn haktuir.

Sekretariu Jerál ASEAN ne’e subliña informasaun di’ak ne’ebé nia hetan katak agora investimentu barak liután mak tama ba Timor-Leste hafoin adezaun Timor-Leste nia hanesan membru plenu, la’ós deit husi nasaun membru sira hanesan Indonézia, Malázia, Singapura no seluk tan, maibé husi mós país seluk.

Timor-Leste iha mós ona konetividade aereu ho vou direita husi Timor-Leste ba Xina, Darwin, Singapura, Malázia, Indonezia ne´ebé desde uluk kedas no sira ne’e hotu hatudu progresu di’ak iha dezenvolvimentu foun sira.

Iha mós programa formasaun barak ne’ebé maka oferese ona ba Timor-Leste, no membru hotu konkorda atu Timor-Leste finaliza rekizitu hotu-hotu tuir rekizitu adezaun tomak no tempu hanesan serbisu iha preparasaun ba prezidénsia ASEAN iha 2029. ***