PNTL ho F-FDTL Halo Apreensaun Ba Sigaru Ilegál Karton 2.583

Ró ne'ebé transporta sigaru ilegál.

Díli, 28 Jullu 2026 (RAFA.TL) – Polísia Nasionál Timor-Leste (PNTL) husi Unidade Polísia Marítima (UPM) ho Ekipa Komponente Naval FALINTIL-Forsa Defeza Timor-Leste (F-FDTL), foin lalais ne’e, deteta ró karga ida iha tasi área Baucau nian ne’ebé transporta sasán ilegál hanesan sigaru  ho kuantidade karton 2.583 no asegura suspeitu na’in-hitu.

Portavóz Polísia Nasionál Timor-Leste (PNTL), Superintendente Xefe  Polísia João Belo dos Reis, Tersa-ne’e, informa bainhira halo tiha apreensaun ba sasán ilísitu sira no kaptura  suspeitu  na’in-hitu ne’e, transporta kedas mai Díli hodi submeter bai ha investigasaun iha Polísia Diresaun Servisu Investigasaun Kriminál (DSIK), Alfándega ho  Ministériu Públiku.

“Ró ne’e hatun ona angkor iha tasi Baucau nian no ita-nia autoridade sira halo intervensaun no apreensaun ba sigaru hamutuk karton 2.583 (marka oin-oin), agora dadauk ita halo hela prosesu identifikasaun ba ema na’in-hitu ne’ebe mak iha ró laran,” portavóz PNTL, Superintendente Xefe  Polísia João Belo dos Reis informa ba jornalista sira.

Husi ema na’in-hitu ne’e,  na’in-lima sidadaun Myanmar no na’in-rua sidadaun Xina. Informasaun ne’ebe RAFA.TL rekolla katak ró karga  ho prova krime sira lori ona mai iha Portu Díli no bainhira autoridade kompetente sira halo pasarevista no investigasaun hetan mós munisoins balun iha ró laran.

Autoridade sira  mós deteta Xinés ida nu’udar na’in atu simu sigaru ilegál  ne’ebé parte DSIK mós asegura ona hodi halo identifikasaun.

Jornalista: João Carlos