PNTL Kaptura Polísia Falsu Na’in-Rua Kobra Suspeitu Xinés Ida ho Montante US$22,000.00

PNTL asegura polísia falsu na'in-rua, Kinta-kalan 23 Jullu 2026.

Díli, 24 Jullu 2026 (RAFA.TL) -Polísia Nasionál Timor-Leste (PNTL) kaptura no detein polísia falsu na’in-rua  (Timoroan) ne’ebé kobra osan ho montante US$22,000.00 ba sidadaun estranjeiru  ida ho nasionalidade Xina.

Xinés ne’e mós  deskonfia hanesan mós suspeitu ba kazu ilísitu scam call centre iha Hera deskonfia halai ses husi operasaun no detensaun polísia nian no sai fujitivu PNTL iha reade  atividade ilísitu scam call centre.

Informasaun ne’ebé iha katak Xinés refere  hamutuk ho nia maluk na’in-21 envolve iha rede scam call centere iha Hera, maibé bainhira autoridade Timor-Leste halo operasaun no buska ba fatin scam call centre ne’e, nia halai subar tiha.

Aproveita situasaun ne’e, polísia falsu na’in-rua kobra osan ho montante US$22,000.00 ba Xinés ne’e ho kompromisu katak polísia falsu na’in-rua ne’e bele liberta Xinés nia maluk na’in-21 ne’ebé autoridade sira detein tanba kazu scam call centre.

Observasun RAFA.TL iha Kinta-kalan 23 Jullu ne’e,  hale’u tuku 22:00 Otl  iha Kuartel Jerál Polísia Nasionál Timor-Leste (PNTL) iha Diresaun Servisu Investigasaun Kriminál (DSIK)  hatudu katak ekipa DSIK transporta  polísia falsu na’in-rua ne’e no halo investigasaun hodi lori ba detein iha sela detensaun Polísia Munisípiu Díli.

Fontes sekreta  iha edifisiu DSIK, informa katak, polísia falsu na’in-rua  ne’e husu osan montante US$22,000.00 ba sidadaun estranjeiru  Xina hodi dehan katak “ita-boot fó osan ho montante US$22,000.00 mai ami sei ajuda ita-boot nia kolega na’in-21 ne’ebé polísia detein hela ne’e, tanba kazu ne’e ami mak kaer”.

Xinés konsege fó duni osan ho montante US$7,000.00 maibé polísia falsu na’in-rua ne’e gasta tiha ona, mas Xinés nia maluk na’in-21  seidauk liberta to’o agora.

Xinés ne’ebé Polísia falsu na’in-rua kobra ne’e konfesa ba autoridade seguransa katak osan ne’ebé polísia falsu na’in-rua husu ba nia ne’e ho garantia katak atu hasai nia maluk na’in-21 husi detensaun. Nune’e,  kada ema polísia fulsu na’in-rua ne’e husu osan ho montante US$1,000.00, inklui atu hasai nia husi naran iha lista  polísia nian hanesan suspeitu. Ho nune’e, tenke entrega osan  ho montante US$22,000.00.

Kazu polísia falsu na’in-rua nian ne’e rejistu ona ho Numéru Úniku Krime (NUC) 0267/26-PNSIC hodi submete ba iha Ministériu Públiku (MP) antes  aprezenta ba Tribunál Judisiál Primeira Instánsia Díli (TJPID).

Jornalista: João Carlos/Editór: Vito Salvadór