PNTL Asegura Sidadaun Estranjeiru Na’in-12 Hala’o Atividade Scam Call Centre iha Tibar

Polísia asegura seidadaun estranejiru na'in-12 deskonfia hala'o atividade scam call centre iha área Tibar, Liquiça, 24 Jullu 2026.

Liquiça, 24 Jullu 2026 (RAFA.TL) – Ekipa Diresaun Servisu Investigasaun Kriminál (DSIK) ho apoiu ekipa Servisu Sekreta, Polísia Nasionál Timor-Leste (PNTL), Sesta-ne’e, asegura sidadaun estranjeiru na’in-12 iha área Tibar, Postu Administrativu Bazartete, Munisípiu Liquiça.

Iha operasaun ne’e, autoridade sira desmantela aprelu eletróniku ne’ebé deskonfia fasilita atividade ilísitu scam call centre.

Operasaun ne’ebé lidera husi Diretór Interinu DSIK nu’udar Xefe Departamentu Forensik Superitendente Asistente Polísia Mouzinho Tavares Correia deskobre atividade ilísitu ne’e ne’ebé liga ho jogu online.

Autoridade polísia mós halo apreensaun ba objetu sira hanesan telefone10-resin, aparelu Starlink rua, osan ho montante ne’ebe seidauk sura, karreta ida no dokumentu pasaporte rua ho nasiondalidade Xina na’in-rua nian. Enkunatu na’in-10 seluk ho Indonézia maibé sira rasik la kaer sira-nia passaporte.

Rezidensia ne’ebé sidadaun estranjeiru sira halo arrendamentu iha fulan-Juñu  ne’e ho  pizu rua, ida okos ne’e sira na’in-12 utiliza hodi toba  no pizu leten utiliza ba hala’o atividade scam call centre.

Bainhira ekipa DSIK halo buska no apreensaun ba fatin ne’e, identifika sidadaun na’in-12 halo hela atividade ilegál ne’e. Nune’e,  autoridade sira halo kedas detensaun ba sidadaun estranjeiru na’in-12 hodi kumre oras 72 iha  Polísia Eskudra Dom Aleixo molok aprezenta ba Ministériu Públiku.

Jornalista: João Carlos/Editór: Vito Salvadór