MTK Sei Altera Taxa Administrativa Foun Ne’ebé Aplika Ba Transporte Sira

Reprezentante sira husi EUTL halo enkontru ho ekipa MTK ne'ebé lidera husi Ministru Miguel Marques Gonçalves Manetelu, Sesta 24 Jullu 2026.

Díli, 24 Jullu 2026 (RAFA.TL)- Ministru Transporte Komunikasaun (MTK), Miguel Marques Gonçalves Manetelu, Sesta-ne’e, hasoru malu ho Movimentu Estudante Universitáriu Timor-Leste (EUTL) no kompromete  halo alterasaun ba Dekreitu lei Nu.17/2026, 06  Maiu 2026, hodi hatun taxa ba transporte sira tuir nesesidade ne’ebé komunidade sira enfrenta.

Ministru Transporte no Komunikasaun, Miguel Marques Gonçalves Manetelu, hateten nia simu audensia no halo diálogu ho estudante sira bazeia ba EUTL nia karta ne’ebé maka antes ne’e submete ona ba MTK atu koa’alia kona-bá taxa ba transporte públiku sira. Tanba ne´e parte MTK rekoñese katak iha duni preokupasaun balu ne’ebé iha razaun atu bele hadia pontu balu ne’ebé la nesesáriu ho povu nia moris.

“Ohin, ami ko’alia, ha’u esplika ligadu ho dekretu lei ne’e, ha’u la’os jurista mais tanba buat ne’e mai husi desizaun politika depois hamosu dekretu ne’e atu regulariza nia implementasaun ne’ebé ha’u esplika, ikus mai ami to’o ba konkordansia ida katak husu para fó  tempu to’o ba alterasaun ne’e, atu buat ne’ebé maka altera labele iha tan reasaun husi públiku,” inistru Miguel Marques Gonçalves Manetelu hateten.

Governante ne´e  afirma ida ne’e hanesan konkordánsia jerál entre EUTL no mós MTK, buat sira ne’ebé maka iha impaktu negativu ba sidadaun sira, liu-liu ba transporte sira governu tenke estuda hodi bele halo ajustamentu ruma.

“Pedidu husi estudante sira atu hatur fila-fali diploma ministeriál uluk, maibe ha’u hatete katak ita sei la fila ba ida ne’e tanba revoga tiha ona, liu-liu regulamentu sira ne’ebé atu regularija kona-bá osan ne’e laho diploma tenke ho dekretu lei ne’e maka ohin ha’u hatete katak se iha ajustamentu ruma tenke halo ajustamentu iha dekretu lei ne’e para halo altersaun la’ós atu fila-fali ba diploma ministeria ne’ebé maka vigora iha 2010,” Nia subliña.

Iha fatin hanesan portavoz EUTL, Natalizio Nunes Martins hatete, ezizensia ne’ebé maka bazeia ba sira nia petisaun ne’ebé antes ne’e submete ona ba MTK, no ohin loron sira kontinua dialogu ho ministru no ministru rasik mós iha konkordánsia ho sira katak, presiza duni atu halo mudansa ba dekretu lei foun nú. 17/29026

“Ministeriu Transporte no Komunikasaun konkora ona ho EUTL no sidadaun hotu-hotu katak sei halo mudansa ka alterasaun ba dekretu lei foun ne’ebé vigora hela, la’ós ba artigu hotu mais ba artigu sira ne’ebé la kondiz ho sidadaun babain ne’ebé moris tuir ekomonmía idak-idak nian,” Natalizio Nunes Martins hateten.

EUTL kontinua ho ezizénsia ida maka atu bele mantein diploma ministerial númeru 03/2010, bele mós mantein dekretu-lei foun, maibé nia kondisaun no aplikasaun sira iha laran ne’e tenke bazeia ba nesesidade sidadaun sira nia.

Jornalista: Remigia Locatelli/Editór: Vito Salvadór