Ouvir RAFA Ritmo, Voz e Coração de Timor
Governu Timor-Leste ho ADB asina Akordu Subvensaun ba finansiamentu adisionál ba Projetu Melloramentu Meiu Subsisténsia Kafé no Agrofloresta nian (CALIP), Sesta 24 Jullu 2026.
Díli, 24 Jullu 2026 (RAFA.TL)- Banku Dezenvolvimentu Aziátiku (ADB) apoiu finanseiru adisionál millaun 4.9 USD ba Projetu Coffee and Agroforestry Livelihood Improvement Porject (CALIP) ne’ebé antes ne’e implementa ona husi Ministériu Agrikultura Peská Pekuaria no Floresta (MAPPF) iha Munisípiu Ermera, Liquiça, Bobonaro, Aileu, Ainaro no Manufahi.
Apoiu ne’e ofisializa liu husi assinatura akordu ne’ebé Governu Timor-Leste reprezenta husi Ministra Finansa Santina Cardoso no reprezentante Banku Dezenvolvimentu Aziátiku (ADB) Michael Joseph Walsh iha Auditóriu Ministériu Finansa, Sesta ne’e.
Reprezentante ADB, Michael Joseph Walsh iha nia diskursu hatete, ohin marka importante ida entre parseria kompartida ho Governu Timor-Leste, bainhira asina Akordu Subvensaun ba finansiamentu adisionál ba Projetu Melloramentu Meiu Subsisténsia Kafé no Agrofloresta nian (CALIP).
Finansiamentu adisionál ida-ne’e sei ajuda habelar projetu ida ne’ebé apoia daudaun ona umakain agrikultór ki’ik sira ne’ebé kuda kafé atu hadi’a produsaun kafé, hametin sistema agrofloresta, no harii meius subsisténsia ne’ebé reziliente liután.
“ADB haksolok atu kontinua servisu hamutuk ho Governu Timor-Leste no parseiru sira hotu atu ajuda garante katak kafé Timor sai produtivu liu, reziliente liu, no inkluzivu liu-kria oportunidade di’ak liu ba família agrikultór sira ohin loron no ba jerasaun sira iha future,” hatete Reprezentante ADB Michael Joseph Walsh.
Ministra Finansa Santina Viegas Cardos hatete, onra ida ba Governu Timor-Leste liuhosi Ministériu Finansa ba serimónia asinatura importante ida-ne’e, signifikativu ho parseria ho Banku Dezenvolvimentu Aziátiku no Governu Japaun.
“Ami iha ne’e atu formaliza finansiamentu adisionál ba Projetu Melloramentu Meiu Subsisténsia Kafé no Agrofloresta ka CALIP ho montante millaun $4.9. CALIP la’ós inisiativa abstratu ida, ida-ne’e maka projetu ida ne’ebé prátiku, inovativu ne’ebé hadi’a daudaun ona ita-nia agrikultór kafé sira nia moris,” Ministra Finansa hateten.
Ministru Agrikultura Peská Pekuaria no Floresta (MAPPF), Marcos “Mameta” da Cruz hanesan implementadór projetu CALIP hatutan, projetu CALIP ne’e la’o tiha ona iha tinan balu nia laran ho orsamentu kuazé iha millaun $3.
“Agora asina tán ne’e bolu dehan adisionál finanseiru aumenta tán osan ba ida ne’ebé la’o tiha ona ne’ebé totál orsamentu ba ida uluk no agora ne’e hamutuk millaun 7,9,5000 USD. Orsamentu adisionál ne’e millaun 4.9 USD uluk ne’e millaun 3 USD ne’e mak hamutuk millaun 7.9 USD,” Ministru Marcos da Cruz esplika.
Membru governu ne’e afirma durante ne’e kuazé agrikultór kafé hamutuk 2000 itál mak hetan ona apoiu husi projetu ne’e iha faze primeiru no finanseiru adisionál ida-ne’e sei kobre tán agrikultór ka familia agrikultór kuazé 2000 itál iha faze tuir mai.
Projetu CALIP jere hamutuk husi Ministériu Agrikultura, Ministériu Finansa, ADB no mós embaixada Japaun tau matan hela no sistema ne’e hala’o ho transparánsia.
Ezekusaun ba fundu ne’e tenke hetan aprovasaun husi Ministériu Finansa iha nia implementasaun sira
Jornalista : Zita Menezes/Editór: Vito Salvadór
Written by: RafaFM
ADB Apoiu Finanseiru Adisionál Millaun 4.9 USD Ba Projetu CALIP
todayNovember 20, 2026 14 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt