Governu Realiza Formasaun Kuadru Teknikú PNDS-PDM

PM Xanana Gusmão halo abertura ba formasaun kuadru teknikú Programa Nasionál Dezenvolvimentu Suku (PNDS) no Planu Dezenvolvimentu Munisipál (PDM), Kinta 23 Jullu 2026.

Díli, 23 Jullu  2026 (RAFA.TL)- Governu liuhosi Ministériu Planeamentu  no Investimentu Estratéjiku  (MPIE), Kinta ne’e, iha Díli, realiza formasaun ba kuadru teknikú  Programa Nasionál Dezenvolvimentu Suku (PNDS) no Planu Dezenvolvimentu Munisipál (PDM), atu hametin kapasidade tekniku iha implementa polítika desentralizasaun podér lokál no fó benefisíu ba povu.

Primeiru-Ministru, Kay Rala Xanana Gusmão iha diskursu hatete, Governu hahú ho dezentralizasaun ne’e ho objetivu atu harí podér lokál no Governu lokál,  iha munisípiu sira,  hodi ida-idak haré espasu iha munisípiu laran saida mak bele halo hodi povu sente katak ukun aan to’o daudaun ona.

“Ne’e duni ohin loron iha ne’e importante tebes tanba ita hasoru malu iha fatin ida-idak ninian temi atu fó governu lokál ba imi, rekursu umanu tenke forte no tenke kompetente, tanba ne’e mak loron rua imi mai deskuti iha ne’e hola parte iha prepara imi,” PM Xanana Gusmão liuhosi nia diskursu iha abertura formasaun ba kuadru teknikú PDM no PNDS.

Xefe Governu mós kestiona projetu Programa Nasionál Dezenvolvimentu Suku (PNDS),  Planu Dezenvolvimentu Munisipál (PDM), balu ne’ebé husi tinan  2021-2022 paradu no la’o atrazu tanba falta iha rekursu umanu.

Fatin hanesan Ministru Planeamentu Investimentu Estratéjiku  (MPIE)  Gastão  Francisco de Sousa, hatete inisiativa ida-ne’e mai mós tanba iha fulan hira ba kotuk kuandu Primeiru-Ministru ho Ministériu Adminstrasaun Estatál (MAE) halo avaliasaun ba kondisaun minimú iha munisípiu  sira haré katak asuntu importante mak  rekursu umanu iha areá  infraestrutura nian, tanba ne’e mak realiza formasaun ida-ne’e.

“Ha’u espera katak ho formasaun ida-ne’e ha’u nia alin sira bele akompaña ho di’ak para bele implementa iha tereñu, maibe tuir faze ne’ebé los tenke planeamentu didi’ak para depois bele implementa ho di’ak hodi bele fó rezultadu ne’ebé di’ak no sustentavél ba nasaun liuliu benefisíu ba ita nian povu,” tenik Ministru MPIE.

Governante ne’e husu formadór sira atu  durante treinamentu durante loron rua nia laran partisipa ho di’ak ativu tanba sei iha oradór lubuk ida balu husi rai li’ur no balu husi Timoroan sira ne’ebé presta servisu iha Ajénsia Dezenvolvimentu Nasionál (ADN).

Partisipa iha formasaun ne’e, enjeñeiru munisipál sira, inklui Rejiaun Administrativa Espesiál Oecusse Ambeno (RAEOA) no Ataúro no marka mos prezensa husi Ministru Administrasaun Estatal, Ministru Planeamentu no Investimentu Estratéjiku, Sekretáriu Estadu Dezenvolvimentu Lokál, Prezidente Autoridades Munisipál sira, Autoridade RAEOA ho Ataúro no enjeñeiru ho oradór sira. No formasaun ne’e sei hala’o durante loron rua hahu 23-24 fulan-Jullu 2026.

Jornalista : Zita Menezes/Editór: Vito Salvadór