Jacinto Ribeiro Dias Nomeadu Ba Prezidente Autoridade Munisipál Aileu

Jacinto Ribeiro Dias, nomea ba kargu Prezidente Autoridade Munisipál (PAM) Aileu. Imajen/Espesiál

Díli, 22 Jullu 2026 (RAFA.TL) – Primeiru-Ministru (PM), Kay Rala Xanana Gusmão, nomea ona Jacinto Ribeiro Dias ba kargu Prezidente Autoridade Munisipál (PAM) Aileu nian, tuir despaxu ne’ebé publika iha Jornal Repúblika, Kuarta-ne’e.

Iha despaxu ne’ebé asina hosi Primeiru-Ministru iha Díli, manda demisaun imediata ba João Bosco dos Santos hosi kargu Prezidente Autoridade Munisipál Aileu nian no nomea ho efetivu kedas Jacinto Ribeiro Dias ba kargu hanesan, hahú hosi loron ne’ebé nia simu pose.

Notísia Relevante: PM Xanana Hatun Despaixu Suspende Permanente PAM Aileu João Bosco dos Santos

Nomeasaun ne’e tuir proposta ida hosi Ministru Administrasaun Estatal, Tomás do Rosário Cabral, ne’ebé indijita Jacinto Ribeiro Dias bazeia ba aliñamentu hosi nia perfil pesoal no profisionál ho ezijénsia sira knaar nian no objetivu sira Governu nian ba autoridade munisípiu sira.

Substituisaun ida-ne’e tuir Primeiru-Ministru nia asinatura ba orden ida iha loron 20 fulan-Jullu, hodi suspende permanentemente PAM anteriór iha tempu ne’ebá, ne’ebé estabelese janela loron 30 nian hodi lansa prosesu aplikasaun foun ba pozisaun ne’e.

Desizaun abtes ne’e, ne’ebé RAFA.TL asesu ona, bazeia ba inkéritu ne’ebé hala’o hosi Gabinete Inspetór Jerál no Auditoria Ministériu Administrasaun Estatál nian; deskobrimentu sira hatudu katak João Bosco dos Santos komete ona violasaun dixiplinár, étika, no kriminál sira ne’ebé maka grave, inklui asédiu seksuál koersivu.

Orden suspensaun ne’e mós fó mandatu ba reinsersaun ba funsionáriu feto ida ne’ebé identifika hanesan Alda.

Asuntu ne’e mosu hosi alegasaun ida ne’ebé sirkula maka’as iha mídia sosiál no iha plataforma streaming, ne’ebé halo Ministru Tomás do Rosário Cabral haruka medida prekausaun iha loron 17 fulan-Jullu. Medida hirak ne’e bandu João Bosco dos Santos atu tama iha resintu Autoridade Munisipál Aileu nian no atu ezerse podér ruma ne’ebé asosiadu ho eskritóriu ne’e bainhira hala’o hela investigasaun. Iha despaxu ida-ne’e, Ministru subliña katak medida ne’e la konstitui prejulgamentu ida kona-ba verasidade hosi alegasaun sira ho objetivu atu proteje de’it interese públiku no kredibilidade hosi instituisaun sira Estadu nian no katak Autoridade Munisipál nia podér sira sei ezerse iha interinu hosi Sekretáriu Munisipál ka delegadu ida tuir despaixu ne’ebé iha.

 Jornalista : Zita Menezes/Editór: Vito Salvadór