PM Xanana ho Membru Governu Parabeniza Estudante Sira Ne’ebé Hetan Medalla iha ASEAN Plus Three Junior Science Odyssey

PM Xanana hato'o parabéns ba estudante Timoroan sira ne’ebé hetan medalla iha kompetisaun Siénsia Internasionál 11.ª ASEAN Plus Three Junior Science Odyssey (APT JSO) ne’ebé hala’o iha Filipina no Malázia, 22 Jullu 2026.

Díli, 22 Jullu  2026 (RAFA.TL)- Primeiru-Ministru no membru Governu sira, Kuarta-ne’e, iha Konsellu Ministru,  fó parabéns ba estudante Timoroan sira ne’ebé hetan medalla osan-mean ida, osan-mutin tolu no bronze rua iha kompetisaun Siénsia Internasionál 11.ª ASEAN Plus Three Junior Science Odyssey (APT JSO) ne’ebé hala’o iha Filipina no Malázia, iha loron 05 to’o loron 11 fulan-Jullu ne’e.

Iha  kompetisaun Siénsia Internasionál anuál ne’e halibur estudante sira hosi Estadu membru ASEAN sira no parseiru tolu hosi bloku  Nordeste Aziátiku nian – Xina, Japaun no Koreia-Súl  hodi promove koñesimentu sientífiku, inovasaun, kriatividade no kooperasaun rejionál. Ida-ne’e mós enkoraja kolaborasaun kona-ba siénsia, sustentabilidade no dezenvolvimentu abilidade sira sékulu XXI nian.

Timor-Leste reprezenta husi estudante na’in-neen husi eskola sira iha Díli: Alandrinho Corbafo Caunan husi Colégio Paulo VI; Angelica da Costa Sequeira husi Eskola Bázika Sentrál Bidau Akadiruhun (EBC); Mendelina del Carmen Mascarenhas husi EBC 30 de Agosto; Nelia Patricio Soares husi EBC São Pedro; Peter Carlos Chima Anaje husi EBC São José Operário; no Salvador da Costa Pacheco husi EBC Esperança da Pátria.

Iha komunikadu imprensa ne’ebé RAFA.TL asesa haktuir katak  liutiha loron balun, Estudante sira husi Eskola Ensinu Báziku St. António Teulale (ESSA Junior) no Eskola Sekundária St. António Teulale (ESSA Senior) iha Baucau, ho medalla 10 no Prémiu Embaixadór Juventude hafoin dezempeñu ne’ebé destakadu iha Konferénsia Siénsia, Teknolojia, Inovasaun no Kreatividade (STICK2020) .

Delegasaun Timor-Leste manán medalla osan-mean lima husi:  Angel Grace Costa de La Rosa, Yinei Doena Maria da Costa Belo, Jeninho Geovanio Maria Alves Xavier, Geovania Bruno Sarmento, Brigida Filita da Costa Guterres.  no osan-mutin lima husi: Florbella Ezania Osório Da Silva, Letícia Greydis Costa Valente, Jolly Petra Daol, Genijia Lucilia Imaculada Pereira, Herfia Febiana Carlos.  iha kompetisaun internasionál Siénsia, Teknolojia, Enjeñaria, Arte, no Matemátika (STEAM), ne’ebé hala’o iha Kuala Lumpur hosi loron 15 to’o 19 fulan-jullu, hodi marka dezempeñu ida ne’ebé maka’as liu iha nasaun ne’e iha eventu anuál ne’e.

STICK halibur estudante sira, profesór sira, peskizadór sira, no inovadór foin-sa’e sira hosi mundu tomak hodi aprezenta peskiza sientífika no projetu inovasaun sira enkuantu promove hanoin krítiku, kriatividade, komunikasaun sientífika no kolaborasaun internasionál.

Estudante sira ne’e mós hetan rekoñesimentu husi Governu, antes hahu Sorumutu Konsellu Ministru ne’ebé hala’o ohin dadeer. Primeiru-Ministru Kay Rala Xanana Gusmão, hamutuk ho membru Governu sira, hato’o parabéns ba estudante sira, profesór sira, no lideransa eskola nian ba sira-nia realizasaun notável hodi reprezenta Timor-Leste ho prestasaun diak tebes iha palku internasionál. Primeiru-Ministru elojia sira-nia dedikasaun, perseveransa, no talentu, hodi nota katak sira-nia susesu nu’udar fonte ba orgullu nasionál no inspirasaun ba foin-sa’e timoroan sira atu buka prestasaun iha siénsia, teknolojia, inovasaun, no edukasaun.

Jornalista: Remigia Locatelli/Editór: Vito Salvadór