Polémika Jet Privadu Cesna C700, Prezidente Repúblika Bolu Urjente MTK, SNI, AACTL no ANATL

Jet privadu ho tipu Cessna C700 tun iha Aeroportu Internasionál Prezidnete Nicolau Lobato, 01 Jullu 2026. Imajen/doc.Espesiál

Díli, 22 Jullu  2026 (RAFA.TL)-  Prezidente Repúblika (PR), José Ramos-Horta, Kuarta-ne’e, balu no halo enkontru urjente ho Ministru Transporte no Telekomunikasaun (MTK), Miguel Marques Gonçalves Manetelu, Diretór Jerál Servisu Nasionál Investigasaun (SNI) Lounginhos Monteiro, Prezidente Konsellu Administrasaun Aeroportu no Navegasaun Timor-Leste (ANATL.E.P) , Romualdo Antonio da Silva, no  ekipa  Autoridade Aviasaun Sivil Timor-Leste  (AACTL) liga ho kazu polémika prezensa  jet privadu ho tipu Cessna Citation 700 Longitude (C700) ne’ebé  aterra iha Aeroportu Internasionál Prezidente Nicolau Lobato (AINPL) hodi lori Prezidente Repúblika nia naran iha loron 01 fulan-Jullu liubá.

Tuir observasaun RAFA.TL nian iha resintu Palásiu Prezidensial hatudu katak   enkontru referé hala’o iha Palásiu Prezidensiál iha tuku 9:00 dadeer  Otl, no remata iha tuku 9:50 Otl.  ekonstru referé konsidera internal no laiha entrevista  no la  permite  jornalista sita husi orgaun komunikasaun sosiál sira ne’ebé destakadu iha Palásiu Prezidensiál atu  halo kobertura.

Hafoin enkontru remata Ministru Transporte no Telekomunikasaun (MTK), Miguel Marques Manetelu sai husi odamatan boot Palásiu Prezidensiál no Diretór Jeral Servisu Nasionál Investigasaun (SNI) Lounginhos Monteiro, ho  Diretór Autoridade Aviasaun Sivil Timor-Leste  (AACTL)  sira sai husi odamatan sorin Palásiu Prezidensiál nian.

Pessoal seguransa Diresaun Nasionál Seguransa no Protesaun Patrimóniu Públiku (DNSPP) ne’ebé destaka iha  Palásiu Prezidensiál no pessoal balun gabinete média Palásiu Prezidensiál nian iha komunikasaun verbal hateten ajenda ne’e interna no bandu sira  hodi labele halo kobertura ba enkontru referé tanba konsidera internal no segredu.

Iha kofnirmasaun direta ho Ministru Transporte no Telekomunikasaun (MTK), Miguel Marques Manetelu, iha Palásiu Governu, hateten iha enkontru Prezidente Repúblika José Ramos-Horta ne’e ko’alia asuntu lubuk ida, inklui mós kazu aviaun Jet privadu ho tipu Cessna Citation 700 Longitude (C700) ne’ebé aterra  iha Aeroportu Internasionál Nicolau Lobato,  ne’ebé iha submisaun karta pedidu aterrasuan lori naran Prezidente Repúblika nian.

“Ha’u dalaruma Prezidente bolu para atu hetan informasaun ruma, mais kona-bá jet privadu ne’e iha prosesu investigasaun, ami labele pronúnsia buat ruma, ami hatene Polísia halo hela servisu ne’e to’o kazu balu ha’u rona katak to’o ona iha Prokuradoria Jerál Repúblika ne’ebé husik investigasau ne’e la’o. Iha diskusaun lubuk ida asuntu seluk, mais ida-ne’e mós hanesan parte ida husi diskusaun ida-ne’e,” Ministru Miguel Marques  Gonçalves Manetelu informa.

Governante ne’e hatete, katak parte Governu presiza atu hadi’a korespondénsia entre liña Ministérial, tanba iha liña koordenasaun di’ak  maibé iha korespondénsia  mak mosu problema.

“Ami MTK ho MNEK liuliu tanba pedidu hotu mai MNEK la’ós liu kedan ba MTK ne’e lae, pedidu sira aviaun atu aterra ka atu semo liu iha lalehan ne’e sempre haruka ba MNEK depois MNEK haruka nota verbal ba ami MTK foin ha’u hasai despaxu ba autoridade aviasaun sivil prosesa no ida-ne’e tenke hadi’a,” Ministru MTK hateten.

Iha Informasaun  ne’ebé RAFA.TL rekolla  husi fontes sira katak polémika kazu aviaun Jet privadu Cessna Citation 700 Longitude (C700) ne’e rejista  ona Ministériu Públiku no iha  Prokuradór titulár nia liman.

Husi dirijente na’in-10 husi parte kompetente sira, hanesan husi  Palásiu Prezidensiál, Minitériu Negósiu Estranjéiru no Kooperasaun (MNEK), Minitériu Transporte no Komunikasaun (MTK), Autoridade Aviasaun  Sivíl Timor-Leste (AACTL), empreza CEVA Logistics no mós servisu Migrasaun (SM) presta ona deklarasaun iha Ministériu Públiku.

Fó hanoin fali katak  iha 01 Jullu 2026,  Aviaun jet privadu ho tipu Cessna Citation Longitude (C700) rejistrasaun  Indonézia tun iha Aeroportu Internasionál Prezidente Nicolau Lobato (INPL) ho objetivu ne’ebé la klaru.

Jet privadu charter ne’e tuir informasaun katak sai  husi Aeroportu Halim Perdana Kusuma-Jakarta mai Díli, Timor-Leste no tun iha Aeroportu INPL por volta 17:15 Otl lori bainaka Prezidente Repúblika nian no atu transporta fila mós sidadaun estranjeiru na’in-tolu seluk iha loron 01 fulan-Jullu 2026.

Jornalista: Zita Menezes/Editór: Vito Salvadór