RENETIL Kontinua Asume Responsabilidade no Papél Importante Ba Konstrusaun Estadu

Xefe Estadu Maiór Jenerál F-FDTL, Tenente Jenerál Domingos Raul Falur Rate Laek partisipa iha kongresu nasionál RENETIL, Sábadu 18 Jullu 2026. Imajen/Espesiál

Díli, 18  Jullu 2026 (RAFA.TL)- Organizasaun Resisténsia Nasionál Estudante Timor-Leste (RENETIL) realiza Kongresu ba dala-IX iha Salaun Universidade da Paz (UNPAZ), sábadu-domingu ne’e,  hodi defini orientasaun estratéjiku sira organizasaun nian ne’ebé kontinua asume responsabilidade no papél importante ba konstrusaun estadu no  dezenvolvimentu Nasionál.

Iha Kongressu Nasionál ne’e mós atu halo avaliasaun ba servisu organizasaun durante períodu lideransa anteriór no defini orientasaun estratéjiku ba futuru.

Kongresu ne’e partisipa husi delegadu sira husi munisípiu oioin, veteranu RENETIL, membru organizasaun, no konvidadu sira husi instituisaun estadu no sosiedade sivil.

Durante kongresu, partisipante sira diskute kona-bá papel RENETIL iha dezenvolvimentu nasaun, kontribuisaun juventude ba demokrasia, hametin unidade nasionál no preservasaun valor luta libertasaun.

Iha abertura kongresu ne’e, Prezidenti Konsellu Sentral RENETIL, José Antonio das Neves “Samalarua”  hateten kongresu ne’e sai oportunidade importante atu halo refleksaun ba dalan ne’ebé organizasaun la’o ona no prepara planu servisu foun atu responde ba dezafiu sira ne’ebé juventude Timor-Leste enfrenta atualmente.

“Tinan 24 ba rejisténsia no tinan 24 ba indenpédensia restaurada perioridade rua ne’e ho idak-idak nia faktu ho guera narativas  iha jornada polítika Timor-Leste nian. Perioridade rua ne’e mak presija haré ita deskute didiak ho kritiku, kongresista sira ba loron rua, Sábadu-Domingu, 18-19 Jullu, motiva presta ita ninia kapasidade kritika ida ne’e ba ita nia situasaun pais tenke solidu reforsa kompremisiu ne’e la’o ba oin,” José “Samalarua” hateten.

Prezidenti Konsellu Sentrál RENETIL ne’e hatutan situasaun barak akontese sai polemika iha media social ba politika ida agora dadauk ne’e, ho ita nia oportunidade ida ne’e hodi deskute no halo analiza diak, para hare Hadia no rejolve situasaun sira ne’e labele implika ba jerasaun foun sira nia futuru.

Xefe Estadu Maiór Jenerál F-FDTL, Tenente Jenerál Domingos Raul Falur Rate Laek nu’udar oradór iha kongresu ne’e husu ba membru RENETIL atu kontinua mantein espíritu patriotismu, integridade no servisu ba interese povu, tanba valor sira ne’ebé harii durante luta ba independénsia tenke sai baze ba dezenvolvimentu Timor-Leste.

“Ita bo’ot sira hola pozisaun atu halo kongresu ida ne’ebe ho ema kritiku, ha’u hatene ita bo’’ot sira halo ona estudu profundu no prespetiva ba ita nia situasaun jerál no partikular iha tempu tuir mai ho sirkuntansia oin-oin maski ita bo’ot sira hola insiativa ida ne’e nu’udar jestu ida ne’ebe ita bo’ot sira sei lahusik kilat dever  ne’ebe ita bo’ot sira kaer. Tanba ne’e presiza ha’u hatete katak hau fó kontenensia ba ita bo’ot sira ninia lealidade nia onestidade ba ita nia rai no ba povu Timor Leste,” Falur Rate Laek hateten.

Kongresu ba Dala-IX ne’e atu produz rekomendasaun no rezolusaun sira ne’ebé bele fortalese organizasaun, aumenta partisipasaun juventude iha prosesu dezenvolvimentu nasional no kontribui ba estabilidade, paz no progresu Timor-Leste.

Ajenda prinsipál kongresu inklui apresensa relatóriu atividades no finansas, diskusaun kona ba alterasaun estatutu karik presiza, aprovasaun programa servisu ba períodu tuir mai, no eleisaun lideransa foun atu dirige organizasaun ba mandatu tuir mai.

Jornalista: João Carlos/Editór: Vito Salvadór