Ofisiál Justisa Na’in-16 Simu Pose Atu Hametin Servisu Justisa iha Timor-Leste

Ofisiál justisa na'in-16 simu posse, Sesta 17 Jullu 2026.

Díli, 17 Jullu 2026 (RAFA.TL) –Prokuradór Jerál  Repúblika (PGR, sigla portuges), Nelson Carvalho, Sesta-ne’e, fó posse ba ofisiál justisa foun na´in-16 atu reforsa rekursu umanu no hametin prestasaun servisu justisa iha Timor-Leste.

Ministeriu Públiku hanesan majistratura autónoma ida ne’ebé dezempeña papel esensiál iha administrasaun justisa. Konstituisaun no lei fó ba MP misaun atu defende legalidade demokratika, hala’o asaun penal, reprezenta Estadu no promove protesaun ba labarik sira, ema ne’ebé laiha kapasidade tuir lei no interese seluk ne’ebé lei proteze, hodi kontribui ba realizasaun justisa no hametin Estadu de-Direitu Demokratiku.

Prokuradór Jerál  Repúblika, Nelson Carvalho iha  nia diskursu hatete Ofisiál Justisa sira hanesan pilár fundamentál ida ba organizasaun Ministériu Públiku.

Nia hateten, ofisiál justisa sira mak garante parte boot hosi tramitasaun prosesu sira, asegura funsionamentu regulár sekretaria sira, hala’o dilijénsia sira, ezekuta notifikasaun sira, organiza prosesu sira, fó apoiu tékniku ba majistradu sira no sai-ligasaun permanente entre Ministériu Públiku ho sidadaun sira, ho nune,e sira-nia servisu la’ós de’it hala’o tarefa administrativu sira.

“Aktu ida-idak ne’ebé imi halo iha influénsia direta ba kualidade servisu ne’ebé Ministériu Públiku presta, ba efikásia investigasaun kriminál, ba tramitasaun prosesu sira ne’ebé lalais no ikus liu, ba konfiansa sidadaun sira nian ba justisa. Importante atu hanoin katak, sidadaun barak, kontaktu dahuluk ho Ministériu Públiku sei akontese liuhosi Ofisiál Justisa ida,” Prokuradór Jerál Repúblika Nelson Carvalho hateten.

Prokuradór ne’e hatutan dever sira ne’e la’ós obrigasaun formál de’it, maibé ne’e mak prinsípiu orientadór ba hahalok lorloron no reprezenta valor fundamentál sira atu hametin prestíjiu Ministériu Públiku no kredibilidade administrasaun justisa.

Fatór iha área asaun penál, ne’ebé Ministériu Públiku iha responsabilidade konstitusionál no legál ida boot, kontribuisaun Ofisiál Justisa sira mos sai determinante.

“Imi nia responsabilidade mak garante tramitasaun lolos ba prosesu sira, prepara dilijénsia , hala’o notifikasaun, organiza expediente administrativu, kontrola prazu sira no fó apoiu tékniku no administrativu hotu ne´ebé majistradu sira presija atu halao sira nia knaar,” nia esplika.

Dadauk ne’e edifisiu Prokuradór iha Munisípiu Manufahi iha hela konstrusaun, no mós sei planu tan loke iha Munisípiu Liquiça no Manatuto. Tanbe ne’e, sei presiza ofisiál barak.

Jornalista: João Carlos/Editór: Vito Salvadór