Ekipa Konjunta Hetan Restu Mortais iha Lafaek Nia Kabun

Lafaek ne'ebé ekipa konjunta hamutuk ho komunidade sira ko'a hodi hetan restus mortais iha nia kabun laran. Imajen/F-FDTL

Díli, 16 Jullu 2026 (RAFA.TL),–Ekipa konjunta Buska no Salvamentu, kompostu husi F-FDTL Komponente Naval (Mergulhador), PNTL Unidade Polísia Marítima (UPM) no APC (Corpo Bombeiros) kontinua hala’o operasaun buka eis-Falintil 24 Anos, António da Costa ne’ebé lakon iha tasi balak Laleia.

Sita husi konta ofisiál media sosiál Companente da Força Naval Ligeria, Kinta-ne’e, revela katak iha loron dahuluk operasaun, ekipa konjunta hala’o buska no salvamentu iha tasi balak Laleia ho apoiu husi komunidade peskador. Maibé, operasaun ne’e la konsege hetan rezultadu.

Iha loron tuir mai, operasaun la bele kontinua tanba kondisaun tasi boot. Maski nune’e, drone ne’ebé uza husi PNTL-UPM deteta lafaek mean ida besik tasi ibun. Tanba ne’e, abitante ida baibain bulu nia naran Félix halo esforsu atu oho lafaek ne’e.

Bainhira lafaek ne’e mate, ekipa sira ko’a no loke nia kabun, hetan restus mortais suspeitu balun, hanesan liman kukun, ain kukun, ruin malun no boraxa ne’ebé vítima uza iha liman.

Restus mortais ne’ebé hetan entrega ba autoridade kompetente atu hala’o investigasaun no teste DNA hodi konfirma identidade.

Ekipa konjunta kompostu husi F-FDTL Komponente Naval, APC Bombeiros Manatuto, autoridade Munisípiu Manatuto, autoridade Postu Administrativu Laleia, CCLN Manatuto no família, dezde kedas iha loron 04 fulan-Jullu 2026, buka ba vítima António da Costa hanesan fetaranu FALINTIL 24 tinan ne’ebé lakon bainhira ba hala’o atividade peska iha  iha área tasi Balak, Aldeia Uma-Uma Rentau, Suku Lifau, Postu Administrativu Laleia, Munisípiu Manatuto.

Durante operasaun buka tuir vitíma, ekipa konjunta halo buka intensivu iha área ne’ebé suspeita, uza kapasidade no rekursu sira ne’ebé disponivel. Maske esforsu tomak ne’ebé halo, to’o remata operasaun iha loron ne’e, seidauk konsege lokaliza vítima António da Costa.

Komponente Naval F-FDTL sei kontinua halo koordinasaun ho entidade relevante sira no prontu atu fó apoiu ba operasaun tuirmai, ho esperansa katak vítima bele lokalizadu lalais no operasaun bele lori rezultadu di’ak.

Komunidade Manatuto no Laleia hamutuk ho autoridade relevante sei kontinua hala’o buska tanba restus mortais seidauk kompletu.

Remata