Faro sira iha Portu Díli Avaria Tempu Narok, Difikulta Movimentu Ró iha Kalan

Faro iha Portu Díli la funsiona tanba avaria tempu narok ona.

Díli, 15 Jullu 2026 (RAFA.TL)- Faro ka lighthouse sira  ihaPortu Díli avaria dezde tempu narok ona. Nune’e, difikulta movimentasaun ró sira tama-sai Portu Díli, liu-liu iha tempu kalan.

Faro mak torre elevadu sira ne’ebé ekipadu ho lampu sira ne´ebé atu orienta mariñeiru sira ho seguru ba portu sira no fó avizu ba ró sira kona-bá tasi-kle’an, tasi-ibun sira, no tasi-ibun sira ne’ebé nakonu ho fatuk.

Faro ne´e opera uza padraun naroman rítmiku sira ne´ebé permite mariñeiru sira atu identifika sira nia fatin ho loloos iha kalan.

Diretór Diresaun Nasionál Transporte Marítima (DNTM), Helder Silva,  rekoñese Faro (Lighthouses) iha área Tasi ibun Portu Díli avaria desde tempu naruk, nune’e sira-nia parte submete ona proposta ba Ministeriu Transporte no Komunuikasaun (MTK) kona-bá manutensaun.

Diretór DNTM esplika katak kestaun tekniku ne’ebé maka DNTM infrenta katak, Faro ne’e rasik ninia lampu sira ho durasaun kleur ona (antigu), hafoin tekniku sira observa katak farol ne’ebé maka instala iha tasi laran ne’e uja lampu ho marka Lantern (espesifikasaun ne’ebé antigu), no agora ne’e kuase nasaun barak la utiliza ona, no muda fali ba marka ida hanaran LED, lampu ne’ebé mós susar atu hetan iha industria sira.

“La lakan ne’e tanba buat ida ohin hau hatete ne’e, nia uza lampu nakdulas ne’e,  agora lampu ne’e la iha ona, ema muda tiha ona, tanba buat sira ikus ne’e sempre mudansa kada fulan-neen, la hanesan ona tempu uluk, agora era modernu ita susar, ne’ebé ita sempre up-date nafatin mudansa  teknolojia liu-liu ba buat sira hanesan ne’e,’ Diretór DNTM, Helder Silva hateten hodi repsonde Rafa.tl iha Portu Díli, Tersa-ne’e.

Diretór ne´e informa, tekniku DNTM identifka ona atu troka lampu antigu Faro nian, ekipa sira hetan ona husi industria balu husi nasaun Japaun ne’ebé mak nia enderesu balu iha nasaun viziñu Indonézia konfirmadu ona, no  hein deit aprovasaun husi MTK hodi nu’uné bele halo manutensaun ba sinais refere.

“Ida ne’e maka prosesu hela, depois ita haré tok oinsá halo manutensaun, espera katak tinan ida ne’e bele,”  nia tenik.

Iha konvensaun Safety Of Life At Sea (SOLAS) reprezenta Konvensaun Internasionál ba Seguransa Ema nian iha Tasi ne’ebé hatuur iha International Association of Marine Aids to Navigation and Lighthouse Authorities (IALA) ne’ebé mak importante tebes iha kontinente hotu-hotu, liu-liu atu fó sinal ba Ró sira ne’ebé halo operasaun iha tempu kalan.

Jornalista: Remigia Locatelli/Editór: Vito Salvadór