Governu Tau Prioridade Ba Setór Importante Haat iha Planu Estratejikú Médiu Prazu 2027-2030

Reuniaun interministeriál hodi hatuur planu sira médiu prazu nian.

Díli, 13  Jullu  2026 (RAFA.TL)- Governu Timor-Leste hatuur prioridade ba setór importante haat hanesan setór dezenvolvimentu ekonomikú, setór dezenvolvimentu sosiál, setór instituisionál no ikus liu setór infraestruturas iha Planu Estratejikú médiu prazu 2027-2030.

Ministru Planeamentu no Investivementu Estratejikú (MPIE), Gastão de Sousa, liuhosi reuniaun interministeriál, Segunda-ne’e, informa sorumutu planu estratejikú longu prazu ne’e aprezenta kona-bá implementasaun planu estratejikú 2011-2030 no mós saida de’it mak tenke prepara no saida mak Governu identifiká hodi bele tau iha  médiu prazu 2027-2030.

“Ita nia planu estratejikú ne’e 2027-2030 ne’e buat barak ne’ebé balu  seidauk halo, balu halo ona, agora atu to’o iha 2030 saida mak presiza atu  halo,  liuliu haré ba setór haat, setór dezenvolvimentu ekonomikú, setór kona-bá dezenvolvimentu sosiál, setór instituisionál no setór infraestruturas,” Ministru MPIE Gastão Sousa informa ba jornalista sira.

Iha tinan 2024 ,Governu hasai rezolusaun ida kona-bá setór haat, no sesé mak atu responsavél no koordena asuntu haat ne’e mak setór instituisionál lidera husi  Ministru Prezidensiál Konsellu- Hermenegildo “Agio” Perreira.

Dezenvolvimemtu ekonomikú  liderá husi Vise-Primeiru-Ministru no Ministru Asuntu Ekonomikú no Ambiente, Francisco Kalbuadi Lay, setór dezenvolvimentu sosiál  liderá husi Vise Primeiru-Ministru no Ministru Asuntu Abitasaun Dezenvolvimemntu Rurál  Mariano Assanami Sabino no setór infraetrutura lidera husi Ministériu Planeamentu Invstimentu Estratejikú  (MPIE)

“Tanba orsamentu 2027 tenke refleta ona fó bazikú ba médiu prazu, ne’e duni, planu asaun anuál tenke refleta ba planu médiu prazu nian tanba ne’e mak ohin hotu-hotu mai iha ne’e para haré saida mak importante iha setór dezenvolvimentu instituisionál,” Ministru MPIE ne’e hateten.

Governante haktuir bainhira aprezenta hotu tiha setór haat ne’e mak sei  finaliza ba relatóriu final hodi aprezenta ba Konsellu-Ministru atu bele haré ba oin.

Jornalista: Zita Menezes/Editór: Vito Salvadór