PR husu Autoridade Seguransa Tenke Luta Maka’ás Harahun Krimé Organizadu Scam Call Centre iha Timor-Leste

Polísia detein sidadaun estranjeiru sira ne'ebé envolve iha atividade ilísitu scam call centre iha Metiaut, Díli, Kinta 09 Jullu 2026.

Díli, 10  Jullu  2026 (RAFA.TL)-  Prezidente Repúblika (PR), José Ramos-Horta, husu autoridade seguransa sira tenke luta maka’ás harahun krimé organizadu hanesan jogu online no scam call centre ne’ebé daudaun ne’e sirkula iha teritóriu Timor-Leste.

“Klaru prosesa ne’e la’o ho Polísia Sientifikú  Investigasaun Kriminál  (PSIC), Polisia Nasionál Timor-Leste (PNTL) depois Prokuradór Jerál Repúblika  (PGR), Tribunál sira, ha’u hatete de’it mak ne’e mensajen polítika mak bele hatete ita tenke luta maka’ás kontra krimé orgamizadu, husi ne’ebé   la interese. Tanba rai sira hotu-hotu iha ASEAN ne’e sira enfrenta krimé organizadu,” Prezidente Repúblika hateten  ba Jornalista sira iha edifisiu PGR, Díli, Sesta-ne´e.

Xefe Estadu hatutan grupu krimé organizadu jogu scam call centre sira tenta tama iha  rai hotu-hotu inklui iha kontinente Amérika, Europa no ASEAN.

“Sira hanoin katak Timor-Leste fasil  tanba ki’ik, tanba la frazil maibé presiza ne’e  tanba frazil ita hatene lalais. Purtantu tenke luta maka’ás kontra sira,” Xefe Estadu alerta.

PR Ramos-Horta hatete, kazu sira ne’e kontinua akontese ne’e la’ós tanba fallansu, maibé jogu ilísitu sira ne’e mós  normal akontese iha nasaun boot sira ne’ebé nia  esperiénsia barak liu, no Timor-Leste tenke fó sansaun todan ba ema sira ne’eb’e inklina aan iha kazu sira ne’e nune’e sira tauk labele mai tán.

Nia husu instituisaun PNTL, PCIC no PGR  ba futuru presiza  kolabora ho polísia sira iha ASEAN nian para bele  trava kazu sira hanesan ne’e labele akontese bei-beik iha Timor-Leste.

Fó hanoin flai katak autoridade PNTL ho PCIC no kooperasaun ho SNI halo detensaun  ona pelumenus ema estranjeiru na’in 213 iha semana tolu ikus ne’e iha operasaun haat hasoru sentru atividade scame call centre  sira iha Tibar, Manleuana, Bebonuk, no Metiaut.

Operasaun sira hatudu aumentu signifikativu ida iha investigasaun sira ba sentru sira ne’ebé deskonfia envolve iha estafa sira online ka jogu online, problema ida ne’ebé maka hamosu preokupasaun nasional no internasional ne’ebé aumenta kona-bá uzu hosi Timor-Leste hosi rede kriminozu internasionál sira.

Jornalista: Zita Menezes/Editór: Vito Salvadór