Loron Rua Ne’e, PNTL ho PCIC Detein Ema Estranjeiru 152 Deskonfia Involve iha Scam Call Centre

Polísia detein sidadaun estranjeiru sira maioria husi Xina ne'ebé deskonfia envolve iha scam call centre. Imajen/PNTL

Díli, 09 Jullu 2026 (RAFA.TL) – Autoridade Timor-Leste kompostu husi Polísia Nasionál Timor-Leste (PNTL), Polísia Sientifiku Investigasaun Kriminál (PCIC), Servisu Nasionál Intelijénsia Estratejiku (SNIE), Servisu Migrasaun no apoiu husi autoridade servisu informasaun sekreta sira, iha loron rua, Kuarta-Kinta ne’e, halo operasaun, buska no apreensaun ba sidadaun estranjeiru besik 152 ne’ebé  deskonfia involve iha atividade ilísitu online scam call centre.

Hahú iha Kuarta liubá, ho informasaun husi komunidade sira, PNTL halo buska no apreensaun ba rezidénsia ida iha Manleuana hodi deskobre no detein sidadaun estranjeiru maioria Xinés na’in-29.

Iha loron tuir mai, Kinta-ne’e, autoridade PCIC, SNIE no PNTL halo buska ba fatin rua la hanesan ho oras ne’ebé lahanesan iha área Díli laran, kompostu husi operasaun primeiru ba armazén ida iha área Bebonuk hodi detein sidadaun estranjeiru na’in-99 maioria husi Xina.

Operasaun hanesan mós PNTL halo iha rezidénsia ida iha área Metiaut, hodi detein estranjeiru na’in-24 no polísia deskonfia forte suspeitu sira balun halai sai bainhira autoridade sira to’o iha fatin operasaun nian.

Husi operasaun buska, apreensaun no detensaun iha fatin tolu iha Díli laran, hanesan Manleuana, Bebonuk no Metiaut ne’e, autpridade sira konsege halo apreensaun ba prova sira lubuk ida hanesan telefone, laptop, servidór, aparelu  fasilita internet  (starlink),  no fasilidade eletroniku sira seluk tan ne’ebé sai hanesan materiál prinsipál ba atividade scam call centre.

Porta-vóz Komandu Jerál Polísia Nasionál Timor-Leste (PNTL), Superintendente Xefe Polísia, João Belo dos Reis hateten ekipa konjunta sira  kontinua buka tuir fatin sira ne’ebé deskonfia halo atviidade ilísitu scam call centre, nune’e bele dezmantela hotu no ema hirak envolve tenke prosesa tuir lei ne’ebé vigora.

“Polísia halo buska ba sira nia fatin no kaptura sira lori mai iha DSIK ho evidénsia sira ne’ebé ita hetan iha fatin ne´ebá maka telefone hamutuk 60, tablet samsung rua, ruter tolu, leptop 22, osan cash hamutuk $5,632.00 ho sira nia pasaporte,” Superintendente Xefe Polísia João Belo dos Reis informa.

Parte Sevisu Migrasaun halo mós identifikasaun ba suspeitu sira ne’ebé maioria sidadaun Xina no Kambodia ne’e utiliza vistu turista hodi envolve iha atividade ilísitu ne’e.

Jornalista : João Carlos/Editór: Vito Salvadór