Xanana husu Feto Timoroan Sira Tenke Aprende husi Megawati

Díli, 09 Jullu 2026 (RAFA.TL)-  Primeiru-Ministru Xanana Gusmão, konsidera Prezidente Repúblika Indonézia ba da-lima, Megawati Soekarnoputri hanesan feto potensial ho vizaun globál ne’ebé infleusia tanba ne’e feto Timoroan sira tenke aprende husi nia.

“Ida-ne’e maka loron ida ne’ebé ita sei la haluha, tanba ita simu ona figura istóriku ida iha Palásiu Prezidensiál, ema ida ne’ebé foin hanorin ita buat barak kona-bá nasaun ida nia moris. Nia sai nu’udár ezemplu ba feto hotu-hotu iha Timor-Leste: ema ida tenke hakat liu  nia hanoin kloot, loron ba loron nian no haku’ak perspetiva luan liuhosi vizaun no misaun ida ne’ebé bele haré ba futuru,” Xanana Gusmão hateten iha konferénsia ba imprensa  hamutuk ho Megawati Soekarnoputri iha Palasiu Prezidensiál, Kinta ne´e.

Xefe Goverrnu mós  hato’o nia agradesimentu ba Megawati Soekarnoputri no ko’alia kona-bá rekonsiliasaun no aspetu moris hotu-hotu hanesan lisaun ida la’ós de’it ba feto Timor-Leste maibé mós ba mane.

Prezidente Partai Demokrasi Indonesia Perjuangan (PDIP) Megawati Soekarnoputri liuhosi komferénsia imprensa hato’o agradese ba Estadu Timor-Leste ne’ebé simu ona nia ho nia delegasaun  vizita iha Timor-Leste  ho furak no apresiasaun.

Nia hateten  sente  falla no  konsidera realidade situasaun funu iha tempu uluk halo nia triste tebes bainhira hanoin kona-bá  ema barak ne’ebé lakon tanba konflitu.

“Nu’udár belun no família kle’ur ona, ha’u hein katak ita kontinua hala’o enkontru sira hanesan ne’e. Antes ne’e, feto balun sujere atu ha’u organiza kursu formasaun ba feto partidu nian. Ha’u kontente tebes ho ideia ida-ne’e, tanba ha’u sempre hakarak feto sira atu hetan kbiit no atu banati tuir dalan ne’ebé ha’u foti,” Megawati hateten.

Megawati mós anúnsia planu atu estabelese kursu formasaun ba feto Timoroan sira, tuir pedidu ne’ebé hato’o ba nia durante vizita ne’e, no defende kriasaun programa apoiu ba empreza mikro, ki’ik, no médiu ne’ebé jere husi feto sira.

Nia mós destaka nesesidade atu proteje propriedade intelektuál hosi produtu artezanatu sira nasaun nian hanesan patrimoniu ne´ebé iha valor istoriku no kultural Timor nian ba mundu Internasionál.

Jornalista : Zita Menezes/Editór: Vito Salvadór