Megawati Hamonu Matan-Been Bainhira Simu Kondekorasaun Grande Collar Ordem de Timor-Leste

PR José Ramos-Horta fó medalla Grande Collar Ordem de Timor-Leste ba Megawati Soekarnoputri iha Palásiu Prezidensiál, Kinta 09 Jullu 2026.

Díli, 09 Jullu 2026 (RAFA.TL)- Prezidente Repúblika Indonézia ba da-lima, Megawati Soekarnoputri, hamonu mata-been  bainhira simu kondekorasaun Grande Collar Ordem de Timor-Leste husi Prezidente Repúblika José Ramos-Horta.

Hafoin simu kondekorasaun, Megawati Soekarnoputri ho matan-been hato’o nia agradesimentu ba povu Timor-Leste ba domin no amizade ne’ebé iha no sei kontinua lori ida-ne´e ba futuru.

“Lidér sira hotu no povu Timor-Leste tomak ne’ebé ha’u sempre hadomi. Ha’u la hanoin katak loron ida ha’u sei simu Grande Collar Ordem de Timor-Leste ne’ebé ohin ha’u simu. Husik ha’u hatete liafuan ida ne’ebé mai husi ha’u-nia laran. Obrigada. Obrigada barak. Ha’u la simu onra ida-ne’e hanesan remata husi istória ida, ka hanesan sinal katak ita-nia knaar hotu ona. Ha’u simu ida-ne’e hanesan hakat foun ida. Ne’e mak mandatu ida ba futuru, no mós promesa ida kona-ba buat sira ne’ebé seidauk halo. Ita ne’e mak Timor-Leste no Indonézia. Ita sei iha buat barak atu halo hamutuk,” Megawati Soekarnoputri iha nia diskursu iha ámbitu simu kondekorasaun Grande Collar Ordem de Timor-Leste, Kinta-ne’e, iha Palásiu Prezidensiál.

Megawati afirma Grande Collar Ordem de Timor-Leste ida-ne’e la’ós de’it medalla ida,  maibé hanesan korente ida, no kada korente suporta korente seluk, ida-ne’e mak sentidu loloos, amizade entre Indonézia no Timor-Leste mak korente ida ne’ebé tenke kontinua naruk, husi jerasaun ida ba jerasaun seluk, no la bele kotu.

Prezidente Repúblika José Ramos-Horta liuhosi nia diskursu hatete, fó Grande Collar Ordem de Timor-Leste ba Megawati Soekarnoputri hanesan Estadu Timor-Leste presta omenajen ba Prezidente da-lima Repúblika Indonézia no ba lider ida ne’ebé moris no karreira polítika liga metin ho transformasaun demokrátika ida ne’ebé boot liu iha Ázia.

“Ha’u haksolok tebes hodi simu Sua Exelénsia Megawati Soekarnoputri, Prezidente da-lima Repúblika Indonézia. Prezensa Ita-Boot iha Uma Estadu ida-ne’e fó oportunidade ba ami atu rekuiñese dalan polítika ida ne’ebé marka kapítulu importante ida iha istória Indonézia nian no iha konsolidasaun demokrasia nasaun ne’e,” Ramos-Horta hateten.

Iha serimonia kondekorasaun ne’e hetan partisipasaun direta husi Primeiru-Ministru Kay Rala Xanana Gusmão, membru Governu sira, Prezidente Parlamentu Nasionál (PPN) Maria Fernanda Lay, Prezidente Tribunal Rekursu Afonso Carmona, Deputadu sira, Embaixador sira iha Timor-Leste hamutuk ho bainaka importante sira seluk inklui sekretariu Jeral partidu PDI Perjuangan Hasto Kristiyanto no membru delegasaun seluk ne´ebé akompaña Eis Prezidente Repúblika Indonézia Megawati Soekarnoputri ne´ebé mos nudar Prezidente PDI Perjuangan.

Jornalista : Zita Menezes/Editór: Vito Salvadór