F.C Porto Taibesse Rekolla Vitória Dahuluk Hafoin Manán DIT F.C 2-1

F.C Posto Taibesse vs DIT F.C. Imajen/LFTL

Díli, 06 Jullu 2026 (RAFA.TL)- F.C Porto Taibesse susesu rekolla vitória dahuluk iha Liga Timorense Primera divizaun, jornada da-lima, hafoin manán nia adversáriu DIT F.C ho score 2-1.

Jogu ne’ebé hala’o Estádim Munispál Díli, Domingu (05/07/2026), Porto Taibesse ho DIT F.C halo jogu ida ho ambisaun boot hodi lansa kontra atake ba malu atu buka oportondade marka golu.

DIT F.C ne’ebé mak hatudu ritmu jogu ho di’ak konsege domina liu bola hodi lansa atake maka’ás ba adversáriu no tama ba iha minutu 14 Porto Taibesse F.C konsege halo kontra atake ne’ebé lais ba liña defeza DIT F.C liu husi jogadór Daniel Appiah.

Kontra atake ne’e obriga guarda rede DIT F.C sai husi área penalti hodi simu bola no mós komete erru hasoru jogadór F.C Porto Taibesse iha grande área liur. Nune’e, árbitru la demora hodi fó kedas kartaun mean direta ba guarda redes DIT F.C, Djingue Mossi.

Menus jogadór ida, DIT F.C mantein domina bola no kontinua lansa atake maka’ás ba liña defeza Porto Taibesse.

Tama ba iha minutu 45+1, Porto Taibesse konsege aproveita oportonidade liu husi kontra atake lais hodi halo golu supreza liu husi asaun jogadór Jardel Piedade hodi muda score ba 1-0 molok ba intervallu.

Kontinua ba jogu segunda, tensi jogu komesa manas liután ba ekipa rua ne’e hodi lansa kontra atake ba malu.

Tama ba iha minutu 64, DIT F.C ne’ebé joga ho jogadór na’in-10 konsege responde golu ida hodi halo empata 1-1 liu husi jogadór Kouda Affo.

Avansadu ho numeru kamizola 10 ne’e marka golu liu husi kabesada hafoin simu asistensia bola kruza hosi nia kompatriota iha liña karuk hodi hatuur score ba 1-1.

Ho score refere jogu kontinua manas liután ba ekipa rua ne’e hodi lansa kontra atake ba malu no tama ba iha minutu 90+5 Daniel Appiah konsege marka tan golu ba rede DIT F.C hodi lori nia ekipa F.C Porto Taibesse lidera hikas ho score 2-1 no too jogu termina ekipa F.C Porto Taibesse mantein lidera no asegura pontu tolu husi jogu ne´e.

Ho rezulatadu vitória ne’e hasai ekipa F.C Porto Taibesse husi zona degradasaun hodi okupa iha pozisaun da-neen ho pontus lima husi jogu dala lima manan ida empata rua no derrota rua. Enkuantu ekipa DIT F.C tun ba iha pozisaun da-sia ho pontus tolu husi jogu dala lima ne´ebé hala’o, manan dala ida no derota haat.

Jornalista: Davilio Valdemir/Editór: Vito Salvadór