Programa Bolsa da Mãe Kondisionál Sanutriu Kontribui Hadi’a Nutrisaun Inan no Oan

PR Ramos-Horta akompaña husi Ministra MSSI Veronica das Dores no parseiru sira halo lansamentu ba Programa Bolsa da Mãe Kondisionál Sanutriu iha Gleno, Kinta 02 Jullu 2026.

Gleno, 03 Jullu 2026 (RAFA.TL)- Governu Timor-Leste ofisiálmente lansa programa pilotu bolsa da mãe kondisionál sanutriu atu ajuda fó protesaun sosiál ba komunidade hodi hadia nutrisaun inan no oan ba futuru.

Tuir Politika IX Governu Konstituisionál nian, programa bolsa da mãe kondisionál sanutriu ne’e dezeña  atu fó apoiu ba inan isin-rua, inan fó susu no labarik sira husi idade tinan-tolu ba kraik. Programa ida-ne’e mós atu apoiu períodu kritiku ida ba dezenvolvimentu fiziku no kognitivu inan no oan, liu husi kombinasaun transferénsia osan suplementu nutrusaun bazeia ba edukasaun nutrisaun no asesu ba servisu saúde no nutrisaun hodi responde ba má-nutrisaun no prevene raes badak.

Programa bolsa da mãe kondisionál sanutriu, tinan ne’e, hahú uluk husi munisipiu tolu hanesan, Covalima, Ermera ho Rejiaun Administrativa Espesiál Oé-Cusse Ambeno (RAEO), ho uma-kain 50,000 ne’ebé identifikadu ona, uma kain vulnerável hamutuk 8,500 hodi hetan apoiu husi programa ne’e.

Programa Bolsa da Mãe ne’e, servisu hamutuk Ministériu Solidariedade Sosiál No Inklusaun ho Ministériu Saúde, Banku Desenvolvimentu Asiátiku (ADB), Organizasaun Mundiál Ai-han (WFP), no implementa liu-husi parseiru ho parte interessada nasionál sira.

Prezidente Repúblika Timor-Leste, José Ramos-Horta, Kinta (02/07/2026), iha Gleno, iha nia diskursu iha ámbitu lansamentu programa ne’e  considera programa refere la’ós fó de’it benefisiu di’ak ba inan-aman sira, maibé ba mós jerasaun foun.

“Ohin, ita halo investimentu ida ne’ebé sei fó benefisiu la’ós deit ba inan no oan sira, ohin loron, maibé mós ba jerasaun Timoroan sira iha futuru. Hamutuk ita harii Timor-Leste ida ne’ebé saúdavel , forte no prosperu liu,” ’ Prezidente Republika José Ramos-Horta hateten.

Ministra Solidariedade Sosiál no Inklusaun (MSSI), Veronica das Dores, esplika programa ne’e atu ajuda fó protesaun sosiál ba servisu nutrisaun ba inan no oan sira iha Timor-Leste.

“Sanutriu reflete ami nia kompromisu atu asegura katak laiha inan ka oan ida mak husik hela iha kotuk. Liu -husi kombinasaun servisu protesaun sosiál, servisu nutrisaun no apoiu komunitariu, ita ajuda família vulnerável sira atu fó sira nia moris sai saudavél liu no kria fundasaun ne’ebé forte liubá futuru Timor-Leste nian,” Veronica das Dores hateten.

Tuir planu Governu Timor-Leste nian, sei kontinua servisu hamtuk hodi kontinua monitoriza programa pilotu hodi hamuosu evidensia no lisaun sira ne’ebé bele informa kona-ba expansaun iha futuru no hametin protesaun sosiál ne’ebé sensível ba nutrisaun iha Timor-Leste.

Partisipa iha Lansamentu Programa Bolsa da Mãe ne’e, Prezidente Repúblika José Ramos-Horta, Ministra Solidariedade Sosiál, Veronica das Dores, membru Governu no  parseria Internasionál, Autoriedade Lokal, Komunidade no jerente husi  Empreza Ti-Oan Fintech ne’ebé hanesan mos ajente banku atu  fasilita Pagamentu Programa Bolsa da Mãe Kondisionál Sanutriu ba benefisiáriu sira iha RAEOA.

Jornalista: David Gonçalves/Editór: Vito Salvadór