Ministériu Interiór Presiza Halo Teste Psikolójiku Regular Ba Membru PNTL Sira

PM Xanana Gusmão halo inspesaun ba parada Polísia iha ámbitu serimonia aniversáriu PNTL ba dala-XXVI iha Palásiu Governu, Sesta (27/03/2026). Imajen/Rafa.tl

Díli, 29 Juñu 2026 (RAFA.TL)- Membru  Parlamentu Nasionál (PN) husu Ministériu Interiór (MI) halo teste psikolójiku regular ba membru Polísia Nasionál Timor-Leste (PNTL) sira  hodi evita kazu uza arma estadu ne’ebé la tuir nia dalan.

Membru  Bankada PD Mariano Fernandes Xavier Malik liuhosi nia intervenzaun  iha plenária  PN, Segunda (29/06/2926), hatete  nia  preokupa ho kazu ne’ebé membru ajente PNTL feto ida tiru nia aan iha Matadoru, alende ne’e iha membru PNTL balu mós uza arma la tuir nia dalan dalaruma ho lanu, uza hodi ameasa ema.

“Husu Vise-Ministru Asuntu Parlamentár atu ko’alia ho Ministériu Interiór para halo fila-fali teste psikolójiku ba kada membru sira. Bele mós halo counseling ba kada membru sira ne’e para oinsá mak uza arma ho di’ak. Sé seidauk halo teste sira ne’e karik kilat ka arma ne’e bainhira servisu remata tenke ba hatama iha armazen, kuandu dadersaan fila mai servisu mak bele utiliza arma sira ne’e,” Deputadu Mariano Malik hateten.

Tuir Deputadu ne’e nia perspetiva katak bainhira  uza arma sira ne’e la tuir nia dalan bele fó riskú ba populasaun, tanba ne’e mak husu Ministériu Interiór fó atensaun ka halo jestaun ba iha uza arma PNTL nian.

Iha fatin hanesan Deputada Bankada CNRT, Maria Gorumali Barreto hanesan mós Prezidente Komisaun F trata asuntu Saúde, Seguransa Sosiál no Igualdade Jeñeru,  afirma  katak nia parte mós preokupa kona-bá kazu ne’e akontese no mós kondisaun membru PNTL sira nian saúde.

“Ha’u aseita tebes atu presiza iha atividade ida ne’ebé mak halo  konselin ba membru PNTL sira nomós iha parte seluk mós iha Orsamentu Jeral Estadu (OJE-2027), sé bele aloká mós orsamentu ida ita hanoin ba iha kondisaun saúde membru PNTL sira,” Deputada Maria Gorumali Barreto hateten.

Tuir fiskalizasaun Komisaun F  katak Governu la aloká  Orsamentu Jeral Estadu (OJE) ba iha instituisaun PNTL hodi tau matan ba membru PNTL sira nia saúde.

“Ha’u hanoin ida-ne’e parte ida importante tebes hodi nune’e bele prevene situasaun ida ne’ebé mak polisia sira labele augenta ho problema ne’ebé mak sira hasoru entaun to’o ikus sira foti medida uza arma sira nia ne’ebé mak iha hodi afeta fali ba sira nia vida moris nian,” tenik Deputada ne´e.

Vise-Ministru Asuntu Parlamentár Adérito Hugo da Costa hatete, liga ho akontesimentu ba membru polísia sira ne’ebé mak utiliza arma  sei envia ba Ministériu Interiór no diskusaun sira ne’ebé posibilidade ba prevensaun iha futuru.

Jornalista : Zita Menezes/Editór: Vito Salvadór